Külli miqdarda rüşvət almaq ittihamı ilə həbs edilən Rusiya müdafiə nazirinin müavini Timur İvanov dövlətə xəyanətdə şübhəli bilinə bilər.
Azpost.info xəbər verir ki, bu barədə Rusiya Federeal Təhlükəsizlik Xidmətinə (FTX) yaxın iki mənbə bildirib.
“Rüşvət ittihamı “publika” üçündür. Hələlik onlar dövlətə xəyanət barədə açıq danışmaq istəmirlər. Bu, böyük qalmaqaldır, hər şeydən əvvəl, müdafiə nazirinin müavinidir…”, – mənbə bildirib.
Başqa bir mənbə qeyd edib ki, İvanov korrupsiyaya görə tutulmazdı, çünki hamı çoxdan bilirdi.
Rusiya mətbuatı yazır ki, FTX-nin Hərbi Əks Kəşfiyyat İdarəsi uzun illərdir ki, İvanovla bağlı kompromat materialları saxlayır. Əvvəllər Rusiya rəhbərliyi bu materialları üzə çıxarmağa icazə vermirdi. Həm də müdafiə naziri Sergey Şoyqu İvanovun müdafiəsinə qalxmışdı.
“İndi onlar nə edəcəklərinə qərar verirlər: ya onu rüşvətə görə həbs edəcəklər və ya ittihamı vətənə xəyanət kimi qiymətləndirəcəklər”, – mənbə bildirib.
Dövlətə xəyanət (Cinayət Məcəlləsinin 275-ci maddəsi) işi Federal Təhlükəsizlik Xidməti tərəfindən araşdırılır. Dövlətə xəyanət və casusluq işləri “gizli” və “tam məxfi” kimi təsnif edilir. Ötən ilin aprelində Rusiya prezidenti dövlətə xəyanətə görə ömürlük həbs haqqında qanun imzalayıb. Bundan əvvəl cəza 12 ildən 20 ilə qədər həbs idi.
Aprelin 24-də səhər saatlarında Moskvanın Basmannı məhkəməsi İvanovu iyunun 23-dək həbsə göndərib. Müstəntiqlərin fikrincə, o, cinayət törətmək üçün üçüncü şəxslərlə cinayət əlaqəsinə girib, Rusiya Müdafiə Nazirliyinin ehtiyacları üçün podrat və subpodrat işləri zamanı əmlak xidmətlərinin göstərilməsi şəklində xüsusilə külli miqdarda rüşvət alıb. Onunla birlikdə işdə iştirak edən başqa bir şəxs Sergey Borodin də həbs edilib. Ona oxşar maddə ilə ittiham irəli sürülüb.
İvanov 2016-cı ilin mayından bu postu tutur. İttiham sübuta yetirilərsə, onu 15 ilə qədər həbs gözləyir. Nazir müavini günahını etiraf etməyib.
Azpost.info
