Rusiya Daxili İşlər Nazirliyinin “nəzarət edilən şəxslərin reyestri”ndə olan miqrantların nikahı qeydə alınmayacaq.
Azpost.info RİA-Novosti-yə istinadən bildirir ki, bu barədə Rusiya ədliyyə naziri əmr imzalayıb.
Əmrə əsasən VVAQ əməkdaşları reysterdə adı olan əcnəbi ilə nikahı qeydiyyata almaqdan imtina edə biləcəklər.
Rusiya Ədliyyə Nazirliyinin əmrinə əsasən, VVAQ əməkdaşlarının DİN-nin reyestrində əcnəbinin və ya vətəndaşlığı olmayan şəxsin olub-olmamasını yoxlaması nəzərdə tutulur. Belə bir yoxlama nikah üçün ərizə alındıqdan sonra, habelə nikahın qeydiyyata alındığı gün aparılacaq. Ərizəçinin adı reyestrdə göstərilibsə, bu, bu xidməti göstərməkdən imtina üçün əsas olacaq.
Rusiyada əcnəbilərin və vətəndaşlığı olmayan şəxslərin reyestrdə qeydiyyatı 2025-ci il fevralın 5-dən qüvvəyə minəcək. “Rusiya Federasiyasında xarici vətəndaşların hüquqi statusu haqqında” federal qanunun yeni normalarına əsasən, 2025-ci ildən Rusiyada qalmaq üçün qanuni əsasları olmayan əcnəbilərə və vətəndaşlığı olmayan şəxslərə ölkədən çıxarılma rejimi tətbiq ediləcək.
Belə vətəndaşlar nəzarət edilən şəxslər üçün yaradılmış reyestrə daxil ediləcək. Bu rejimə düşən əcnəbilər ya Rusiyanı tərk etməli, ya da Rusiyada yaşamaq üçün qanuni əsaslar əldə etməli olacaqlar. Bu məsələ həll olunana qədər onlarla bağlı bir sıra məhdudiyyətlər tətbiq olunacaq.
Bundan əlavə, 2024-cü ilin avqustunda Rusiya Federasiyasının Ailə Məcəlləsinə və “Vətəndaşlıq vəziyyəti aktları haqqında” federal qanuna dəyişikliklər edilib.
