Bu qaydada getsək, ikirəqəmli inflyasiya olmayacaq – Ekspert

Qaynarinfo-ya açıqlamasında bunu iqtisadçı ekspert Fuad İbrahimov Mərkəzi Bankın 2025-2026-cı illər üzrə elan etdiyi inflyasiya proqnozlarını şərh edərkən deyib:

“2025-ci ildə tənzimləmə prosesində hər hansı bir qeyri-adi uyğunsuzluq olmayacaq. Azərbaycanda inflyasiyaya idxal amili də təsir edir. İndiki vəziyyətdə isə proses stabilləşməyə doğru gedir. Bu səbəbdən Mərkəzi Bankın cari ilin inflyasiya səviyyəsi ilə bağlı açıqlamasında hər hansı qeyri-ciddi uyğunsuzluq yoxdur. 2026-cı ilə gəldikdə, öncə onu qeyd edim ki, Mərkəzi Bank makroiqtisadi tarazlığı saxlamaqla son 3-4 ildə elastik idarəetmə üsulu ilə bütün neqativ halların aradan qaldırılması istiqamətində fəaliyyət göstərir. Amma geostrateji mövqeyimiz elədir ki, qonşu ölkələrdə, regionda cərəyan edən proseslər Azərbaycana da təsir edə bilər. Bu mənada 2026-cı il üçün 3,8 faizlik inflyasiya dərəcəsi bir o qədər də real görünmür. İstisna deyil ki, inflyasiya faizi göstərilən bu rəqəmdən bir qədər çox olsun. Ancaq bu qaydada getsək, ikirəqəmli inflyasiya da olmayacaq”.

Qeyd edək ki, Azərbaycan Mərkəzi Bankı inflyasiya proqnozunu açıqlayıb.

Bikdirilib ki, ümumilikdə, mövcud monetar siyasət inflyasiyanın hədəf diapazonu daxilində saxlanılmasına və inflyasiya gözləntilərinin sabitləşməsinə yönəlib. Mövcud siyasət çərçivəsində baza senari üzrə 2025-ci və 2026-cı ildə illik inflyasiyanın hədəf daxilində (4±2%) olacağı proqnozlaşdırılır. Belə ki, Mərkəzi Bankın hesablamasına görə, 2025-ci ildə illik inflyasiyanın 5,5, 2026-cı ildə İSƏ 3,8 faiz ətrafında olacağı gözlənilir.