Türkiyədə gənc oğlanı küçədə başqası ilə səhv salaraq, öldürüblər.
Lent.az yerli mediaya istinadla bildirir ki, hadisə İstanbulun Bağçılar qəsəbəsində baş verib. 2-si tibbi maska taxan 3 suriyalı küçədə 27 yaşlı Veysel Şirini borclarını qaytarmayan şəxslə səhv salaraq bıçaqlayıblar.
Xəstəxanaya yerləşdirilən gəncin həyatını xilas etmək mümkün olmayıb.
Polisin keçirdiyi əməliyyat nəticəsində hadisədə şübhəli bilinən 5 nəfər saxlanılaraq, istintaqa təhvil verilib. Araşdırma aparılır.
Xatırladaq ki, yanvarın 6-da Rusiyanın paytaxtı Moskva şəhərində əslən azərbaycanlı olan gənc qətlə yetirilib.
Paytaxt ərazisində yerləşən çoxmərtəbəli binada mənzillərdən birinə basqın olub. Mənzilə basqın edən naməlum şəxslər evdə tək olan 20 yaşlı azərbaycanlını binanın 13-cü mərtəbəsindən yerə atıblar. O, hadisə yerindəcə keçinib.
Məlumata görə, qətlə yetirilən şəxs “Azpetrol”un sabiq prezidenti Rafiq Əliyevin qaynı Müxalif Hüseynovun oğludur.
Mərhumun meyiti bir neçə gün əvvəl Azərbaycana gətirilib və Cəlilabad rayonunda torpağa tapşırılıb.
Qeyd edək ki, M.Hüseynov uzun illər Rusiyada hüquq-mühafizə orqanlarında çalışıb və hazırda təqaüddədir.
Rafiq Əliyev sabiq iqtisadi inkişaf naziri Fərhad Əliyevin qardaşıdır.
