Apple “Watch” sahiblərinə 20 milyon dollar ödəyəcək
Apple ağıllı saat sahibləri ilə uzun müddətdir davam edən mübahisəni həll edib. İndi istifadəçilərə on milyonlarla dollar təzminat ödəməyə hazırdır. AzPost bildirir ki, bu barədə “CNET” nəşri məlumat yayıb.
2019-cu ildə Apple Watch 1, 2 və 3-ün sahibləri Tim Kukun rəhbərlik etdiyi Apple-a qarşı iddia qaldırdılar. Onlar iddia edirdilər ki, bu saatlardan istifadə ciddi zədə və hətta sağlamlığa zərər verə bilər. Xüsusilə, onlar batareyaların sıradan çıxa, şişməyə və hətta alovlana biləcəyinə dair potensial problemləri qeyd etdilər.
Təxminən altı ildir ki, Apple məhkəməni və iddiaçıları cihazlarının etibarlı və təhlükəsiz olduğuna inandırmağa çalışır. Təşkilat iddiaçılarla razılığa gəlib və onlara 20 milyon dollar ödəməyə razılaşıb. Hər bir istifadəçi üçün kompensasiya məbləği 50-60 ABŞ dolları arasında olacaq.
Korporasiyanın nümayəndələri mediaya münaqişənin həll olunduğunu bildiriblər. Lakin onlar “Apple Watch modellərinə qarşı irəli sürülən ittihamlarla qətiyyən razı olmadıqlarını” vurğulayıblar. Təzminat almaq üçün istifadəçilər Apple ilə əlaqə saxlamalı və əvvəllər qarşılaşdıqlarına dair sübut təqdim etməlidirlər.
Xatırladaq ki, Apple daha əvvəl proqram satışından hədsiz gəlir əldə etməkdə ittiham olunurdu. Apple-ın maliyyə direktoru Kevan Parekh inhisarçılıq ittihamlarını rədd edərək, “şirkətin mənfəətini dəqiq ölçməyin mümkün olmadığını” deyib. O, izah edib ki, “Apple” iPhone-ların və ümumilikdə rəqəmsal xidmətlərin satışından əldə olunan gəliri nəzərə alır.
