“Kişi sözü”nün ikinci hissəsini hazrlayıram… Nazirlik kinonun evini yıxdı”
Kinorejissor, aktyor, ssenarist Cahangir Mehdiyev musavat.com-a müsahibə verib.
Hər kəsin yaddaşında “Kişi sözü” filmindəki Niyaz obrazı ilə qalan rejissorla söhbətimizə elə bu mövzudan başladıq. Əməkdar incəsənət xadimi bildirdi ki, filmin ikinci hissəsinin ssenarisi üzərində işləyir.
AzPost müsahibəni təqdim edir.
-Həm yaradıclığımla bağlı kitab yazıram, həm də “Kişi sözü” filminin ikinci hissəsinin ssenarisini hazırlayıram. Bu kitabı yazıb bitirəndən sonra dünyamı dəyişəcəm. Nə qədər tez yazsam, o qədər də tez öləcəyəm.
-Niyə belə bədbin fikirləşirsiniz?
-Nə bilim. Bu həyatda bir arzum qalıb, o da mənim şərəf və qürurumla bağlıdır. Hamı söz verir, amma heç kim kömək etmək istəmir.
-Bu arzu nə ilə bağlıdır ki?
-Onu deyə bilmərəm, sirdir. Bu haqda kitabımda yazacağam. Abbasqulu Ağa Bakıxanov haqqında film çəkmişdim. Onun da mənim kimi arzusu var idi. İllərlə gözlədi, ölümünə yaxın arzusuna çatdı. İndi bilmirəm, mən arzuma çatıb öləcəyəm, yoxsa çatmamış öləcəyəm.
-Bu hansısa fəxri ad istəyi ilə bağlıdır?
-İndidən demək istəmirəm. Mənə ad lazım deyil, 25 il bundan qabaq ulu öndərdən “Əməkdar incəsənət xadimi” adını almışam. Bu, mənə kifayətdir. Vaxt gələr deyərəm.
-Dediniz ki, “Kişi sözü” filminin ikinci hissəsini çəkmək istəyirsiniz. Aktyor heyətindən ağlınızda kimlər var?
-Həmin filmdən bir mən sağam, bir oğlum, bir də Sənubər İsgəndərli sağdır. Ssenaridə 44 günlük müharibəyə böyük yer ayırmışam.
Mən “Papaq” filmini Şuşada çəkmək istəyirdim. Sonradan Şəkini seçdim. Azad olunandan sonra da Şuşaya getdim, daha da gözəlləşib.
-Kinosuz qalmaq sizi darıxdırmır ki?
-İndi kinonun əvvəlki vəziyyəti deyil. Kinostudiyada fəaliyyət yoxdur.
-Kinostudiyaya gedib gəlirsinizmi?
-Mən Peşəkar Kinorejisorlar Gildiyasının idarə heyətinin üzvüyəm. İclasdan iclasa gedirəm.
– “Kişi sözü” filmindəki tərəf-müqabiliniz, aktrisa Sənubər İsgəndərli ilə əlaqəniz varmı?
-Bayramlarda telefon əlaqəsi saxlayırıq. Qismət olsa, ikinci filmə çəkərik. O da ssenari üzərində işlədiyimi bilir. Gərək müharibələrə son qoyulsun, sülh müqaviləsi bağlansın ki, incəsənət və kino dirçəlsin. Ümumiyyətlə, kino ilə bağlı ayrıca qurum olmalıdır. Mədəniyyət Nazirliyinin balansına keçəndən sonra kinonun taleyi döndü.
Cəlil Məmmədquluzadənin “Anamın kitabı” əsərini ekranlaşdırmaq istəyirdim. Nazirlik pul ayırmadı, dedilər o yoxdur, bu yoxdur. Onlar kinodan başqa hər şeylə məşğul olurdular. Nazirlik kinonun evini yıxdı. Nazirin qəbuluna düşə bilmədim, boş vədlər verirdilər.
-Bu günlərdə başınızı necə qatırsınız?
-Mütaliə edirəm, çıxışlara qulaq asıram.
-Yolunuzu davam etdirən varmı?
-Oğlum, rejissor Elnur Mehdiyev mənim davamçımdır.
– Yeri gəlmişkən , indi kişilər sözünü tuta bilirmi?
– Əsas əməldir, söz deyil. Məsələn, Paşinyan sözünü tuta bilmir. Sülh istədiyini deyir, sonra da Ermənistanı silahlandırır. Bizim prezident isə deyir ki, sözümüz imzamızdır.
– 2011-ci ildən Milli Olimpiya Komitəsində çəkiliş qrupunun rəhbəri kimi çalışırsınız. Bununla bağlı işlər nə yerdədir?
– Davam edir. Rəhbərlik edirəm. İdmanla bağlı yaxşı filmlər çəkmişik. Mən əməkdar məşqçiyəm. İdmanla məşğul olmuşam. Məşqçi kimi dünya çempionu hazırlamışam. İdman mənim yaradcılığımın ayrılmaz hissəsidir. Prezident haqqında film də çəkmişdim. Mən yeganə adamam ki, həm əməkdar məşqçiyəm, həm də əməkdar incəsənət xadimiyəm. Cavan vaxtlarımda dünya çempionu hazırlamışam. İdman mənim həyat tərzim idi.
– Bəs indi necə, idmanla məşğul ola bilirsinizmi?
– İndi ağır idmanla yox, bədən tərbiyəsi ilə məşğul oluram. Bu yaşda nailiyyətlər əldə etmək çox çətindir.
