”Durmaq” qadağandır nişanının qoyulması sakinlərin evlərinə rahat getməsinə ciddi maneə yaradıb.
Xezerxeber.az xəbər verir ki, söhbət paytaxtın Yasamal rayonu Şərifzadə küçəsi 145 ünvanından gedir. Sözügedən ərazidə fərdi yaşayış evlərində yaşayanlar deyirlər ki, 3 günüdür ki, evlərinin qarşısına durmaq qadağandır nişanı qoyulub. Bu da onların həmin ərazidə avtomobillərini park etməsində çətinlik yaradıb.
Qeyd edək ki, bu nişanın təsir dairəsində sürücülər yalnız sərnişini düşürüb, mindirməli və yaxud da yükü boşaldıb getməlidirlər. Lakin ərazidəki evlərin həyətinə avtomobillə girmək mümkün olmadığından əlacsız qalıb onlar avtomobili həmin nişanın təsir dairəsində park edirlər.
Məsələ ilə bağlı Yerüstü Nəqliyyat Agentliyindən “Xəzər Xəbər”ə bildirildi ki, həmin ərazidə sürücülər nəqliyyat vasitələrini uzun müddətli saxlayırlar. Bu da ərazidə qısa müddətli sərnişinlərin düşürülməsi məqsədilə nəqliyyat vasitələrinin dayanmasına yer tapılmamasına səbəb olur. Eyni zamanda bu nəqliyyat vasitələri ərazidə mövcud olan dayanacaq məntəqəsinə avtobusların daxil olmasına da maneə yaradırlar. Əlavə yürüyüşün, nəqliyyat vasitələrinin yolun hərəkət hissəsinin digər zolaqlarında da dayanmasının qarşısını almaq üçün ərazidə “Durmaq qadağandır!” nişanı quraşdırılıb. Yaxın gələcəkdə sözügedən küçədə parklanma məntəqələri də təşkil ediləcək.
Xezerxeber.az mövzu ilə bağlı daha ətraflı videomaterialı təqdim edir.
