Metro
Dünən “Aztelekom” MMC-nin daha bir tenderi baş tutub. Həmin müsabiqəyə əsasən dövlət qurumu 182 min 900 manatlıq kabel satın alacaq.
Qeyd edək ki, bu tenderin qalibi “CASPİON CONSTRUCTİON AND PROCUREMENT” MMC olub.
Tribunainfo.az bu şirkətlə bağlı kiçik bir araşdırma aparıb. Bu zaman məlum olub ki, “CASPİON CONSTRUCTİON AND PROCUREMENT” keçən il 5 tenderin qalibi olub. Həmin tenderlər üzrə bağlanılan müqavilələrin dəyəri isə 3 milyon 315 min 151 manat təşkil edib.
Bildirək ki, bu şirkət ötən il ən bahalı və sayca ən çox “Bakı Metropoliteni” QSC-nin tenderlərinin qalibi olub. Belə ki, QSC ilə MMC arasında bağlanılmış iki müqavilənin toplam dəyəri 1 milyon 718 min 375 manat olub. Bu isə o deməkdir ki, “CASPİON CONSTRUCTİON AND PROCUREMENT” il ərzində tenderlərdən əldə etdiyi vəsaitin yarısı “Bakı Metropoliten”in payına düşüb.
Bu şirkətin ikinci bahalı tenderi isə Naxçıvan Şəhər Rabitə İdarəsinin keçirdiyi müsabiqə olub. Yeni fiber-optik magistral şəbəkənin yaradılması üçün rabitə avadanlıqlarının və materiallarının satınalınmasını əhatə edən bu prosesdə MMC 1 milyon 179 min 410 manatlıq müqavilə bağlayıb.
Qeyd edək ki, “Caspion Construction and Procurement MMC” şirkəti 2021-ci ildə yaradılıb. Şirkətin əsası isə 2018-ci ildə Türkiyədə qoyulub. Lakin şirkətin rəhbərinin kimliyi barədə öz saytlarında belə məlumat yoxdur. Məlum olan odur ki, MMC hazırda Xətai ray., Babək pr-i, Ələddin Quliyev 1131, Babək Plaza B7-02 ünvanında fəaliyyət göstərir. (Tribunainfo.az)
