Kiyevin Podolsk Rayon Məhkəməsi Ukraynanın keçmiş prezidenti Viktor Yanukoviç və Ukrayna Dövlət Təhlükəsizlik Xidmətinin keçmiş rəhbəri Konstantin Kobzarı qiyabi olaraq 15 və 10 il müddətinə azadlıqdan məhrum edib.
AzPost bildirir ki, Viktor Yanukoviç dövlət sərhədindən qanunsuz keçirilməsini təşkil etmə və fərarilikdə təqsirli bilinib.
Konstantin Kobzar isə şəxslərin Ukraynanın dövlət sərhədindən qanunsuz keçirilməsinin təşkilində ittiham olunub.
İstintaqın məlumatına görə, 2014-cü il fevralın 23-də Ukraynanın sabiq prezidenti Prezident Təhlükəsizlik Xidmətinin keçmiş rəhbəri və Rusiya Federasiyasının nümayəndələri ilə əlbir olaraq hava nəqliyyatı ilə Ukraynanın dövlət sərhədini qanunsuz keçərək öz yaxın çevrəsindən və Dövlət Təhlükəsizlik Xidmətinin hərbi qulluqçularından azı 20 nəfərin keçirilməsini təşkil edib.
Onlar Rusiya Silahlı Qüvvələrinin pilotunun nəzarəti altında üç Rusiya hərbi helikopteri ilə Donetsk vilayətinin Manquş rayonunun Urzuf kəndinin kənarından Rusiya Federasiyası istiqamətində Yeysk şəhərindəki hərbi aerodrom istiqamətində havaya qalxıblar. Onlar orada bir müddət qaldıqdan sonra Anapaya uçub və oradan Rusiya Silahlı Qüvvələrinin nümayəndələrinin təqdim etdiyi hərbi nəqliyyat təyyarəsi ilə Krım Muxtar Respublikası ərazisindəki Qvardeyskoye hərbi aerodromuna yollanıblar.
Keçmiş prezident Rusiya hərbçiləri tərəfindən dəniz yolu ilə Krım Muxtar Respublikasından təxliyə edilib.
Nəticədə dövlət təhlükəsizlik qüvvələrinin bir hissəsi eks-prezidentlə birlikdə dəniz gəmisi ilə Sevastopoldan Rusiya Federasiyasına yola düşüb. Onlar hərbi xidmətə qayıtmayıblar.
Yanukoviçin Ukrayna və Rusiya ərazisindən keçdiyi marşrut planlaşdırılıb, tam nəzarət edilib və Federal Təhlükəsizlik Xidmətinin əməkdaşları və Rusiya Federasiyasının Cənub Hərbi Dairəsinin hərbçiləri tərəfindən müşayiət olunub. Bu, birbaşa Rusiya prezidenti ilə razılaşdırılıb.
