Müasir texnologiyanın inkişafı və əmək bazarının dinamikası dünyada peşələrə olan tələbatı sürətlə dəyişir. AzPost.az xəbər verir ki, 2025-ci ildə iş dünyasında üstünlük təşkil edəcək ixtisas sahələri ilə bağlı beynəlxalq araşdırma nəticələri açıqlanıb. Hesabata əsasən, yaxın illərdə rəqəmsal texnologiya və süni intellekt sahəsi əmək bazarının əsas istiqamətlərindən birinə çevriləcək.
Xüsusilə data analitikləri, süni intellekt mühəndisləri, kibertəhlükəsizlik mütəxəssisləri və rəqəmsal marketinq üzrə ekspertlər ən çox tələb olunan peşələr sırasına daxil olub. Eyni zamanda, psixoloq, sosial işçi və təhlükəsizlik mütəxəssisi kimi humanitar sahələrdə də tələbatın artacağı gözlənilir.
Araşdırmaya əsasən, pandemiya dövründə onlayn xidmətlərin və məsafədən iş imkanlarının genişlənməsi rəqəmsal bacarıqlara olan ehtiyacı artırıb. Bu səbəbdən, UX/UI dizayner, veb proqramçı və onlayn kontent yaradıcıları da 2025-ci ildə ən populyar ixtisaslar arasında olacaq.
Mütəxəssislər bildirir ki, bu tendensiya Azərbaycanda da müşahidə edilir. Yerli şirkətlər və startaplar rəqəmsal transformasiya prosesinə sürətlə qoşulur və yeni peşə sahiblərinə ehtiyac artır. Xüsusən də IT sektoru, qrafik dizayn, loqistika və e-ticarət sahəsində peşəkar kadrlara tələbat getdikcə böyüyür.
Hesabat müəllifləri vurğulayır ki, yaxın gələcəkdə istənilən sahədə uğur qazanmaq üçün rəqəmsal bacarıqların inkişaf etdirilməsi vacib olacaq. Bu isə o deməkdir ki, əmək bazarında rəqabət güclənəcək və fərqlənən, peşəkar bilik və bacarıqlara malik şəxslər daha çox irəli çəkiləcək.
