Ayı
ABŞ-ın Yuta ştatında evə girən qara ayı çarpayıda yatan kişiyə hücum edib. AzPost xəbər verir ki, hadisə yerli media tərəfindən təsdiqlənib və ABC4 telekanalı bu barədə məlumat yayıb.
Məlumata görə, hadisə gecə saatlarında baş verib. Ayılaraq otağına yad səsin daxil olduğunu anlayan şəxs, ilkin mərhələdə hərəkət etməməyə və ayının onu fərq etməyəcəyinə ümid edib. Lakin bu taktikası uğursuz olub – yırtıcı onun çarpayısına yaxınlaşaraq əlini dişləyib.
Zərərçəkmiş şəxs dərhal xəstəxanaya çatdırılıb və tibbi yardım alıb. Hadisə yerinə gələn Yuta Təbii Sərvətlər Departamentinin əməkdaşları xüsusi təlim görmüş itlərin köməyi ilə hücumu törədən ayını həmin gün taparaq zərərsizləşdiriblər.
Hadisədən sonra yenidən gündəmə gələn qara ayılar (el arasında “baribal” olaraq tanınır) Şimali Amerikanın ən geniş yayılan ayı növü sayılır. Yetkin erkəklər 1,4 – 2 metr hündürlüyə və 360 kiloqrama qədər çəkiyə malik olur. Adətən insanlara qarşı aqressivlik nümayiş etdirməyən bu növün hücumları ABŞ-da ildə orta hesabla bir dəfə qeydə alınır.
Mütəxəssislər son illərdə ayıların insan yaşayış məntəqələrinə yaxınlaşmasını iqlim dəyişiklikləri və qida mənbələrinin azalması ilə əlaqələndirirlər. ABŞ-da bu kimi halların qarşısını almaq üçün vətəndaşlara meşəlik ərazilərdə ehtiyatlı davranmaları tövsiyə edilir.
