Nanobotlar
Yapon alimlərinin apardığı son tədqiqatlar tibbi texnologiyada inqilab yarada bilər. AzPost bildirir ki, bu barədə Tokio Universitetinin professoru Hiroşi Nakamura Nikkei Asia-ya açıqlama verib. Onun sözlərinə görə, ağıllı nanobotlar gələcəkdə damar daxilində hərəkət edərək tıxanma və laxtalanmanın qarşısını almaq üçün istifadə ediləcək.
Nakamura bildirib ki, bu cihazlar insan qan dövranında mikroskopik səviyyədə hərəkət edərək, damar divarlarında yığılan trombları müəyyən edib aradan qaldıracaq. Həkim qeyd edib ki, bu texnologiya ilk növbədə infarkt və insult riskini azaltmaq məqsədi daşıyır.
Alimin sözlərinə görə, nanobotlar süni zəka ilə idarə olunacaq və bədəndəki problemli sahələri avtomatik olaraq müəyyən edə biləcək. Tədqiqat qrupu artıq heyvanlar üzərində ilkin sınaqları uğurla həyata keçirib.
Nakamura əlavə edib ki, bu texnologiya gələcəkdə diabet, xərçəng və digər xəstəliklərin də diaqnostika və müalicəsində tətbiq oluna bilər. Mütəxəssis vurğulayıb ki, yaxın illərdə ilk klinik sınaqlar başlayacaq və nəticələr ümidvericidir.
Yapon alimləri hesab edir ki, tibbdə bu cür nanobotlar 2030-cu ilə qədər praktik istifadəyə verilə bilər.
