Bakı sakini Fatimə Məmmədli “Kontakt Home” mağazasından aldığı soyuducu ilə bağlı ciddi narazılıq bildirib.
AzPost-un məlumatına görə, soyuducu bir fəhlə tərəfindən təkbaşına həyətə daşınıb və orada qoyulub. Məcbur qalıb qonşusundan kömək istəyərək cihazı evə yerləşdiriblər.
Soyuducu üç saat istirahət rejimində qaldıqdan sonra işə salınıb. Lakin cihazdan gələn yüksək səslər ailə üzvlərini narahat edib. Şikayətçinin sözlərinə görə, soyuducunun səsi motor səsi qədər gurultulu olub və bu vəziyyət mütəmadi hal alıb.
“Zəng etdik, dedilər ki, təzədir, səsi keçəcək. Həqiqətən bir müddət sakitləşdi, amma bir həftə sonra daha da gurultulu işləməyə başladı. Kim eşidirsə, deyir ki, bu soyuducu xarabdır, belə səs olmamalıdır,” – deyə Fatimə Məmmədli bildirib.
Ən ciddi problem isə zəmanətli məhsula görə müştəridən usta xidmətinə görə pul tələb edilməsidir. “Əvvəl dedilər 10 manat, sonra 20, indi də 25 manat istəyirlər. Axı bu soyuducunun 3 il zəmanəti var. Mən niyə təmirə görə pul ödəməliyəm?” – deyə şikayətçi haqlı olaraq sual edir.
Fatimə Məmmədli cihazın çıxardığı gurultulu səsləri də mağazaya göndərdiyini, lakin onların yalnız pul ödədikdən sonra ustanın baxış keçirəcəyini dediklərini vurğulayıb.
Qeyd edək ki, vətəndaşlar bu hallarla qarşılaşdıqda İstehlakçı Hüquqlarını Müdafiə edən qurumlara və Antiinhisar və İstehlak Bazarına Nəzarət Dövlət Xidmətinə müraciət edə bilərlər.
