Birmarket
Birmarket onlayn platformasından məhsul alan müştəri keyfiyyətsiz malların geri qaytarılması ilə bağlı yaranan ləng prosesə görə şikayətçidir.
AzPost xəbər verir ki, sosial şəbəkə istifadəçisi Amil Dostalıyev platformadan iPhone adapteri aldığını və məhsulun nasaz çıxmasından sonra geri qaytarılma proseduruna başladığını bildirib. Müştəri məhsulu təhvil verdikdən sonra artıq 1 ay keçməsinə baxmayaraq, hələ də heç bir nəticə əldə edə bilmədiyini qeyd edib:
“Özləri yazıblar ki, diaqnostika prosesi maksimum 14 gün çəkir. Amma bu gün 30 gündür gözləyirəm və yenə deyirlər ki, məhsul diaqnostikadadır. Sanki kosmik gəmi diaqnostika olunur.”
Amil Dostalıyev əlavə edib ki, bu cür halların təkrarlanması Birmarket-dən alış-veriş edən vətəndaşların etimadını sarsıdır:
“Nə məhsulu geri alıram, nə də pulumu. Bəlkə də bundan sonra Birmarketdən nəsə almaq risklidir.”
Qeyd edək ki, Birmarket – əvvəllər Umico Market adı ilə tanınan platformadır və son aylarda adı dəyişdirilərək yeni brend altında fəaliyyət göstərir.
Hazırda platforma tərəfindən bu konkret şikayətə dair ictimai cavab verilməyib. Hüquqşünaslar isə bildirirlər ki, istehlakçıların aldadılması və ya xidmətin gecikdirilməsi ilə bağlı hallar üzrə vətəndaşlar Antiinhisar və İstehlak Bazarına Nəzarət Dövlət Xidmətinə rəsmi şəkildə müraciət edə bilərlər.
