D. Əliyeva adına Azərbaycan Qadınlarının Hüquqlarının Müdafiə Cəmiyyəti İctimai Birliyinin, Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirdiyi “Bələdiyyə fəaliyyətinin genişləndirilməsi” adlı layihənin növbəti tədbiri 2025-ci il 8 avqust tarixində Astara rayonunun “Şindan” otelinin zalında keçirildi.
Tədbirdə 19 nəfər iştirak etdi. İştirakçılar əsasən Astara rayon bələdiyyə nümayəndələrindən ibarət idi. Tədbirdə həmçinin Astara Rayon İcra Hakimiyyətinin nümayəndələri Cəbrayıl Babayev və A. Qulamzadə iştirak edirdilər.
Təlimi Cəmiyyətin təlimçiləri Əntiqə Qurbanova və Nabat Qəniyeva apardılar. Layihənin ikinci mərhələsi, tədbirin birinci mərhələsinin qısa xülasəsi və iştirakçıların iştirakı ilə başlandı. Ardınca birinci mərhələnin sonunda ev tapşırıqlarının təqdimatı keçirildi. Təqdim olunan 4 layihə iştirakçılar tərəfindən müsbət qarşılandı.
Daha sonra təlimçi Əntiqə Qurbanova aşağıdakı mövzularla bağlı geniş məlumat verdi:
- Sosial problemlərin həllinə əhalinin cəlb edilməsi;
- İnsan haqlarının, xüsusilə qadın haqlarının müdafiəsində bələdiyyələrin rolunun artırılması (qadınlara pozulmuş hüquqlarının müdafiəsində necə kömək edə biləcəkləri).
Mövzular üzrə iştirakçılar geniş müzakirələr apardılar və öz təcrübələrini bölüşdülər. Qadın bələdiyyə sədrlərinə bələdiyyələrdə qadın otaqlarının yaradılması tövsiyə olundu. Onlara məişət zorakılığı qurbanlarına necə yardım göstərə biləcəkləri barədə də məlumat verildi. İştirakçılara izah olundu ki, Azərbaycan Respublikasının “Məişət zorakılığının qarşısının alınması haqqında” Qanunu məişət zorakılığının qarşısının alınması, zorakılıqdan zərərçəkmiş şəxslərin müdafiəsi və zorakılıq törədənlərin məsuliyyətə cəlb edilməsi üçün hüquqi baza yaradır. Bu qanun məişət zorakılığının fiziki, psixoloji, cinsi və iqtisadi formalarını əhatə edir və ailə üzvlərini, o cümlədən uşaqları qoruyur.
Tədbirdə həmçinin kiçik qruplarda iş aparıldı. Mövzu – “Donorlar niyə sizə maliyyə vəsaiti verməlidir?” idi. İştirakçılar 4 qrupa bölündülər. Qruplar bələdiyyə, fond və yerli sahibkarlardan ibarət oldu. Təlimçi izah etdi: “Hər qrup üzvləri birgə müzakirə edəcək. Bələdiyyə üzvləri fond rəhbərliyi ilə necə əlaqə qurmalı, onları ideyalarına necə inandırmalı və həmin ideyaları necə təqdim etməlidirlər?”
Qruplar birlikdə işlədilər və hər qrupdan bir nəfər, həmçinin sahibkar və ya fond rəhbəri birlikdə təqdimat etdilər.
Tədbirdə iştirakçılar üçün çay və şirniyyat süfrəsi təşkil olundu.
