Pullar
Vətəndaşların xaricə pul köçürməsinə tələbat son illər əhəmiyyətli dərəcədə artıb. İstər ailə üzvlərinə dəstək, istər təhsil və ya tibbi xərclərin ödənilməsi, istərsə də biznes məqsədilə olsun, bu əməliyyat bir neçə qanuni və təhlükəsiz üsulla həyata keçirilə bilər.
AzPost xəbər verir ki, ən çox istifadə olunan vasitə SWIFT köçürmələridir. Bu sistem vasitəsilə Azərbaycandakı bank hesabından istənilən ölkədəki bank hesabına pul göndərmək mümkündür. Əməliyyat rəsmi şəkildə sənədləşdirildiyi üçün iri məbləğlərdə ən etibarlı üsul hesab olunur.
Digər geniş yayılmış seçim beynəlxalq pulköçürmə sistemləridir. Western Union, MoneyGram, Contact kimi xidmətlər dünyanın onlarla ölkəsində fəaliyyət göstərir və sürətli şəkildə pulun həm nağd, həm də hesab vasitəsilə qəbul edilməsini təmin edir.
Son illərdə kartdan karta köçürmələr də aktivləşib. VISA Direct və Mastercard MoneySend sistemləri ilə Azərbaycandan xarici ölkələrdəki kartlara birbaşa və operativ köçürmə mümkündür.
Maliyyə ekspertləri bildirirlər ki, iri məbləğlərdə bank kanalları daha təhlükəsiz hesab edilir, gündəlik xırda köçürmələrdə isə sürətli pulköçürmə xidmətləri rahatlıq təmin edir.
Qeyd edək ki, hər üsulda komissiya haqları və valyuta məzənnələri fərqlidir. Vətəndaşlara əməliyyatdan əvvəl bu şərtləri müqayisə etmələri tövsiyə olunur.
