İtaliyanın məşhur Amalfı sahillərində xoşagəlməz hadisə baş verib. AzPost xəbər verir ki, güclü fırtınalardan sonra dəniz sahilə onlarla ölü siçovul çıxarıb. Bu mənzərə turistlərin və yerli sakinlərin narazılığına səbəb olub, insanlar təhlükədən yayınmaq üçün təcili olaraq çimərlikləri tərk ediblər.
Hadisə ən çox Salyerno bölgəsindəki Torryone çimərliyində müşahidə olunub. Sosial şəbəkələrdə yayılan videolarda dalğaların siçovul cəsədlərini quma çıxardığı əks olunub. Bir neçə gün əvvəl Mərkattello çimərliyində də oxşar vəziyyət qeydə alınmışdı.
İtaliya parlamentinin üzvü Françesko Emilio Borrelli məsələ ilə bağlı açıqlama verərək, yerli səhiyyə orqanlarını təcili araşdırma aparmağa və sahilləri təmizləməyə çağırıb. Onun sözlərinə görə, bu, yalnız şəhər mədəniyyəti məsələsi deyil, həm də ictimai sağlamlıq üçün ciddi təhlükədir.
Regional müşavir Aurelino Tommazetti də hadisəyə münasibət bildirib. O, siçovul cəsədlərinin fırtınadan sonra küçə sularının dənizə axıdılması ilə sahilə düşdüyünü vurğulayıb. Tommazetti həmçinin qeyd edib ki, vaxtında tədbirlər görülmədiyinə görə vəziyyət böhran həddinə çatıb.
Turistlər və yerli sakinlər narahatdır ki, sahillərdə çimərlik mövsümü təhlükə altında qala bilər. Xüsusilə Torryone çimərliyi illər boyu təmiz suyu və şəffaflığı ilə məşhur olub, hətta Maldiv adaları ilə müqayisə edilirdi.
Xatırladaq ki, bundan əvvəl də Avropanın digər turizm bölgələrində oxşar hallar yaşanmışdı. İspaniyanın Kosta-Blanka sahillərində zəhərli “mavi əjdahalar” — təhlükəli dəniz şırnaqları səbəbindən çimərliklər bağlanmışdı.
