Azərbaycanın müasir tarixi 27 sentyabr 2020-ci il səhərindən başlayan 44 günlük Vətən Müharibə ilə yeni mərhələyə qədəm qoydu.
Bu gün – 27 sentyabr Anım Günü – ölkəmizin bütövlüyü və xalqımızın azadlıq iradəsi uğrunda canından keçən şəhidlərin xatirəsini yad etmək üçün ümumxalq günüdür.
Bu il həmin şanlı tarixdən 5 il keçir.
2020-ci ilin 27 sentyabrında Ermənistan ordusunun genişmiqyaslı təxribatlarına cavab olaraq Azərbaycan Silahlı Qüvvələri əks-hücum əməliyyatlarına başladı. Qısa müddətdə ordumuz xalqın dəstəyi ilə Qarabağın və ətraf rayonların azadlığı uğrunda tarixi savaşa atıldı.
44 gün davam edən müharibə Azərbaycan xalqının iradəsini, ordunun gücünü və dövlətin siyasi qətiyyətini dünyaya nümayiş etdirdi. Prezident İlham Əliyevin sözləri ilə desək: “Biz Vətən müharibəsində həm döyüş meydanında, həm diplomatiya masasında, həm də informasiya savaşında tarixi qələbə qazandıq. Bu qələbə xalqımızın birliyinin, dövlətimizin gücünün nəticəsidir.”
Vətən Müharibəsi xalqımızın minlərlə qəhrəman övladının şücaəti ilə tarixə yazıldı.
Şəhidlərimiz canını torpaq uğrunda fəda edərək azadlıq dastanı yazdılar. Qazilərimiz döyüş meydanında göstərdikləri igidlik və yaraları ilə qəhrəmanlıq simvoluna çevrildilər.
Azərbaycan xalqı həm ön, həm də arxa cəbhədə bir yumruq kimi birləşərək dövlətin yanında dayandı.
Şəhidlərin ailələrinin söylədikləri isə bu günün mahiyyətini daha da dərindən anladır. Bir şəhid atası deyir: “Oğlumun qanı yerdə qalmadı. Biz indi qürurla onun qəbrinə baş əyirik. Torpaqlarımız azad olmasaydı, bu ağrı ikiqat olardı.”
Vətən Müharibəsindən keçən 5 il ərzində Azərbaycan böyük dəyişikliklərə imza atdı. Dövlətimizin ərazi bütövlüyü tam təmin olundu.
Bu gün azad olunmuş Qarabağda –Xankəndində, Ağdərədə, Xocalıda, Şuşada –bütün torpaqlarda bərpa işləri gedir. Şəhərlər, kəndlər, yollar, hava limanları və enerji infrastrukturu sıfırdan qurulur. Qarabağın mədəni və strateji ürəyi olan Şuşa yenidən dirçəlir.
Qayıdış proqramı uğurla icra olunur. Artıq məcburi köçkünlərin doğma yurdlarına qayıdışı başlayıb.
Beynəlxalq müstəvidə qələbənin təsiri göz önündədir. Azərbaycanın regional və qlobal nüfuzu artıb, ölkə söz sahibi gücə çevrilib.
Prezident İlham Əliyev Anım Günü ilə bağlı çıxışında vurğulayıb: “Şəhidlərimizin xatirəsi qarşısında baş əyirik. Onların göstərdiyi qəhrəmanlıq, bizim azad torpaqlarda qurduğumuz şəhərlər, kəndlər və qürurla dalğalanan üçrəngli bayrağımızla əbədiləşəcək.”
27 sentyabr yalnız hüzn günü deyil, həm də qürur və yaddaş günüdür. Bu tarix xalqımıza azadlığın və müstəqilliyin dəyərini xatırladır, gələcək nəsillərə Vətənin qorunmasının müqəddəs borc olduğunu öyrədir. Bir şəhid anasının sözləri bu hissi əks etdirir: “Oğlumun şəhadəti ilə fəxr edirəm. Mənim qürurum odur ki, bu gün uşaqlarımız Qarabağ haqqında nağıllardan yox, gerçək həyatdan öyrənirlər.”
27 sentyabr – Anım Günü Azərbaycan xalqının həm kədərini, həm də qürurunu birləşdirən gündür. Bu gün biz şəhidlərimizin xatirəsini ehtiramla yad edir, qazilərimizin fədakarlığını dəyərləndiririk.
Beş il əvvəl başlayan Vətən Müharibəsi Azərbaycanı yeni tarixi mərhələyə çıxardı – azadlıq, ədalət və milli birliyin simvoluna çevrildi. Bu yolun davamı isə sülh, inkişaf və gələcək nəsillərin xoşbəxt gələcəyi üçün atılan addımlarda özünü göstərəcək.
Sunay Aydın
AzPost
