Vətəndaşlardan biri Fəvvarələr meydanında yerləşən KFC restoranındakı xidmət səviyyəsindən narazılığını bildirib.
Şikayətçi deyir ki, tələsik olduğu bir vaxtda tvister sifariş versə də, yeməyin hazırlanması üçün 35 dəqiqə gözləməli olub. Halbuki, həmin vaxt restoran boş imiş:
“Gördüm ki, tvister sadəcə stolun üstündə qalıb, bişməyə belə qoymayıblar. İşçilər isə söhbətləşib deyib-gülürdülər. Sonra başqa bir müştəri də tvister sifariş verdi, onu da gözləməyə qoydular. Belə başa düşdüm ki, müəyyən sayda sifariş yığılmayınca bişirməyə başlamırlar”.
Narazı vətəndaş qeyd edib ki, vaxtının az olduğunu görüb, yeməyi belə almadan restoranı tərk edib. Onun sözlərinə görə, bu, fast food prinsiplərinə ziddir və müştəriyə hörmətsizlikdir.
“Mən orda vaxt öldürməyə getməmişdim. İnsanlar ac olur və tez xidmət gözləyirlər. Adı üstündə fast food-dur. Ancaq KFC-də elə bil nazla işləyirlər. Təəssüf ki, belə məsuliyyətsiz davranışla ilk dəfə qarşılaşdım. 10 il əvvəl KFC-yə gedəndə hər zaman dolu olurdu və sifariş də vaxtında gəlirdi. İndi isə vəziyyət tamam fərqlidir”, – deyə müştəri AzPost.az-a bildirib.
Qeyd edək ki, şikayətçi hadisəni ictimailəşdirərək restoran rəhbərliyinin məsələyə diqqət ayırmasını istəyib.
