KontaktHome
Aygün adlı müştəri “Kontakt Home” mağazalar şəbəkəsindən alış-veriş zamanı yaşadığı problem barədə sosial şəbəkədə şikayət paylaşıb.
AzPost bildirir ki, onun sözlərinə görə, ayın 6-da rayondan Bakıya gəlməzdən əvvəl mağaza ilə əlaqə saxlayaraq soba və şirəçəkən almaq istədiyini bildirib, lakin məhsulun yalnız anbarda olduğunu öyrənib.
Müştəri əvvəlcədən razılaşdırıb ki, məhsul 28 May ərazisindəki mağazaya gətirilsin və o, ayın 9-da oradan götürsün. Lakin sonradan vəziyyət tam əksinə olub: “Kuryer zəng edib dedi ki, çatdırılmanı etdim, 28 Mall filialından götürə bilərsiz. Getdim mağazaya, mənə dedilər ki, guya evə çatdırılma qeyd olunub, məhsulu verə bilmərik. Dedim ki, mən rayona qayıdıram, hara çatdırırsız axı? Heç kim məsuliyyət daşımır, hər kəs sadəcə ‘şikayətinizi qeydə alırıq’ deyir.”
Aygün xanım bildirir ki, məsələ ilə bağlı 6060 qaynar xəttinə dəfələrlə zəng etsə də, yalnız formal cavablar alıb və problemin həllinə dair heç bir addım atılmayıb.
“Üstündən neçə gün keçib, hələ də baxırlar… Amma hara baxırlar, necə baxırlar, bu məlum deyil,” — deyə müştəri qeyd edib.
Şikayət sosial mediada geniş müzakirəyə səbəb olub.
Kontakt Home məsələ ilə bağlı rəsmi cavabında bildirib: “Salam, Aygün xanım. Xoşagəlməz təcrübə yaşamağınızı əsla istəməzdik. Biz mütləq müraciətinizi incələyib sizinlə əlaqə saxlayacağıq. Bunun üçün, zəhmət olmasa, sənədləşmədəki ad, soyad, ata adı və aktiv əlaqə nömrənizi şəxsi mesaj üzərindən bizimlə paylaşardınız.”
