ABŞ-ın İndiana ştatının Uaytstaun qəsəbəsində səhər saatlarında ağır hadisə baş verib.
Azpost.az yerli mediaya istinadla xəbər verir ki, ev sahibi Kurt Andersen səhv ünvan gətirdiyi üçün evinin kandarında dayanan qadını – Mariya Florinda Rios Peres de Velaskesi güllələyib. Qadın hadisə yerində dünyasını dəyişib.
Məlum olub ki, qadın həyat yoldaşı Maurisio ilə birlikdə təmizlik briqadasının tərkibində işləyirmiş və həmin gün iş üçün yaxınlıqdakı başqa ünvana getməli imişlər. Heç biri evə daxil olmağa cəhd etməyib, lakin Andersen içəridən, qapıdan birbaşa atəş açıb.
Bun qraflığının prokuroru Kent İstvud açıqlamasında bildirib ki, ev sahibinə “ehtiyatsızlıqdan qəsdən adam öldürmə” maddəsi üzrə ittiham irəli sürülüb. O vurğulayıb ki, qərar ştatın “ərazini qoruma hüququ” kimi tanınan qanununa zidd deyil, sadəcə bu hadisənin xüsusiyyətləri həmin müdafiə qaydasına uyğun gəlmir.
Prokurorluq qeyd edir ki, Andersenin ölümcül gücdən istifadə etmək üçün əsaslı səbəbi olmayıb. Yəni ona real təhlükə törədildiyini düşünməyə hüquqi əsas görünməyib.
Qadının ailəsinin vəkili Aleks Limones bu ölümü “qarşısı alına bilən faciə” adlandırıb və bildirib ki, dörd uşaq anasız qalıb. Ailənin sözlərinə görə, hadisə baş verəndə qadın sadəcə dayanıb və qapını döyməyə hazırlaşırmış.
Hadisədən sağ çıxan Maurisio Velaskes yerli telekanala bildirib ki, güllə qapının arasından atılıb və sonra qapıda açıq şəkildə güllə dəliyi tapılıb. O deyib: “Əvvəlcə polis çağırmaq lazım idi, qapının arxasından atəş açmaq yox.”
Uaytstaun polisi baş verənləri “çox həssas və mürəkkəb hadisə” adlandıraraq, cəmiyyətə istintaqa müdaxilə etməməyi və gəzən şayiələrə uymamağı tövsiyə edib.
Məlumat üçün qeyd edək ki, bir müddət əvvəl ABŞ-ın Missuri ştatında da yeniyetmə oğlan yanlış ünvana yaxınlaşdığı üçün güllələnmişdi.
