Avropa və Yaxın Şərq ölkələrinin xarici işlər nazirləri cümə günü İstanbulda bir araya gələrək İran ətrafındakı gərginliyi, Yəməndəki müharibəni və beynəlxalq dəniz daşımalarında yaranan problemləri müzakirə edəcəklər.
Görüş Türkiyənin xarici işlər naziri Hakan Fidanın təşkilatçılığı ilə keçiriləcək. Bu barədə dpa agentliyi məlumat yayıb.
Danışıqlarda Almaniya, Fransa, Böyük Britaniya, Misir, Pakistan və Səudiyyə Ərəbistanının xarici işlər nazirləri iştirak edəcəklər.
Almaniya hökumətindəki mənbələrin agentliyə verdiyi məlumata görə, tərəflər Hörmüz boğazındakı vəziyyəti, İrandan qaynaqlanan təhdidləri, Yəməndəki münaqişəni və onun dəniz daşımalarına təsirini, həmçinin Yəməndəki husilərin Səudiyyə Ərəbistanına hücumlarını müzakirə edəcəklər.
Hakan Fidan Qəzza zolağındakı vəziyyəti, İsrailin İordan çayının qərb sahilində yaşayış məntəqələrini genişləndirməsini və israilli köçkünlərin fələstinlilərə qarşı zorakılığını da gündəmə gətirmək niyyətindədir. Türkiyənin Anadolu agentliyinin məlumatına görə, nazir beynəlxalq ictimaiyyətin bu məsələlərə daha qətiyyətli reaksiya verməsinə və İsrailə təzyiqlərin artırılmasına çalışacaq.
Görüşün digər mövzusu Rusiyanın Ukraynaya qarşı müharibəsi fonunda Qara dəniz vasitəsilə taxıl ixracında yaranan fasilələr olacaq. Bu tədarüklər Qlobal Cənub ölkələrinin bir çoxunun ərzaq təminatı baxımından böyük əhəmiyyət daşıyır.
Görüşün təşəbbüskarları Almaniyanın və Türkiyənin xarici işlər nazirləri Yohann Vadeful və Hakan Fidan olublar.
Almaniya rəsmilərinin sözlərinə görə, onlar bu görüş vasitəsilə uzun müddətdir davam edən münaqişələrin həlli istiqamətində səylərə yeni təkan verməyə və həmin münaqişələrin Avropaya, eləcə də digər regionlara təsirlərini azaltmağa ümid edirlər. Bu təsirlərə enerji daşıyıcılarının qiymətlərinin artması ilə bağlı problemlər də daxildir.
