Dünya Azərbaycanlılarının Həmrəylik Gününə həsr olunmuş “Şəhidim mənim, qürurum mənim” layihəsi keçiriləcək.
Dünya Azərbaycanlılarının Həmrəylik Günü münasibətilə “ŞUŞA” Peşəkar Futbol Klubu tərəfindən məktəblilər arasında vətənpərvərlik ruhunun yüksəldilməsi məqsədilə “Şəhidim mənim, qürurum mənim” adlı inşa müsabiqəsi təşkil olunacaq.
Layihənin əsas məqsədi gənc nəslin milli-mənəvi dəyərlərə bağlılığını gücləndirmək, şəhidlərimizin müqəddəs xatirəsini yad etmək, onların göstərdiyi qəhrəmanlıq nümunələrini məktəblilərə aşılamaqdır. Müsabiqə çərçivəsində iştirakçı şagirdlər şəhidlərimizə həsr olunmuş düşüncə və duyğularını inşa formatında təqdim edəcəklər. Təqdim olunan yazılar peşəkar münsiflər heyəti tərəfindən qiymətləndiriləcək, qaliblər diplom və mükafatlarla təltif olunacaq.
Tədbir proqramına eyni zamanda məktəblilər arasında futbol yarışı da daxildir. Turnirin keçirilməsində məqsəd sağlam həyat tərzinin təşviqi, gənclər arasında komanda ruhunun formalaşdırılması və dostluq münasibətlərinin möhkəmləndirilməsidir.
Mövzu ilə bağlı “ŞUŞA” Peşəkar Futbol Klubunun prezidenti Güləli Bağırov bildirib: “Şəhidlərimiz xalqımızın əbədi qürur mənbəyidir. Onların xatirəsini yaşatmaq və qəhrəmanlıq yolunu gənc nəslə düzgün şəkildə ötürmək hər birimizin mənəvi borcudur. ‘Şəhidim mənim, qürurum mənim’ müsabiqəsi və paralel olaraq təşkil edilən futbol yarışı bu ali məqsədə xidmət edir.”
“ŞUŞA” Peşəkar Futbol Klubu bütün futbolsevərləri, valideynləri, müəllimləri və ictimaiyyət nümayəndələrini bu mənalı tədbirdə iştirak etməyə və gənclərə dəstək göstərməyə dəvət edir.
Əlaqə məlumatları:
“ŞUŞA” Peşəkar Futbol Klubu
Tel: +994702372227
E-mail:officialshushapfc@gmail.com
Son tarix: 31.12.2025
Qaliblər 15 gün sonra elan ediləcək
