Astronomlar ulduzlararası 3I/ATLAS kometası ilə bağlı daha bir qeyri-adi xüsusiyyət aşkar ediblər. AzPost xəbər verir ki, Harvard Universitetinin tədqiqatçısı Avi Lebin açıqlamasına görə, bu obyekt artıq 14-cü anomaliyası ilə elmi ictimaiyyətin diqqətini cəlb edir.
Məlumata görə, 3I/ATLAS kometasının şüa axınının forması dəyişib və bu dəyişiklik mövcud klassik kometa modelləri ilə uyğunluq təşkil etmir. Əgər bu axın buzun Günəş şüalarının təsiri ilə buxarlanması nəticəsində yaranıbsa, müşahidə olunan yeni həndəsi quruluş ciddi suallar doğurur.
Alim bildirir ki, kometanın nüvəsinin fırlanma oxu Günəşə yaxınlaşma anında demək olar ki, işıq mənbəyinə paralel vəziyyətdədir. Sapma cəmi səkkiz dərəcə təşkil edir. Maraqlısı odur ki, həmin anda kometanın Günəşdən məsafəsi Yer-Günəş məsafəsindən təxminən beş dəfə çox olacaq. Bu cür uyğunluğun təsadüfi baş vermə ehtimalı isə cəmi 0,5 faiz olaraq qiymətləndirilir.
Lebin sözlərinə görə, əgər bu uyğunluq olmasaydı, kometanın “anti-quyruğu” Günəşə doğru daha böyük bucaq altında yönəlməli və daha kəskin mövqelər dəyişməsi nümayiş etdirməli idi. Lakin müşahidələr bu dəyişmənin çox zəif olduğunu göstərir ki, bu da yeni suallar yaradır.
Alim daha əvvəl də 3I/ATLAS-ın anti-quyruğunun qeyri-adi davranışına diqqət çəkmişdi. Bu anti-quyruq işıqlanır və Günəş istiqamətinə yönəlir. Halbuki adi kometalarda Günəş radiasiyası və hissəcik axını toz və qazı əks istiqamətə aparır. Bu fenomenin səbəbi hələ də məlum deyil və Lebin qeyd etdiyi kimi, mövzu indiyədək NASA-nın ixtisaslaşmış elmi konfranslarında belə müzakirə olunmayıb.
Qeyd edək ki, 3I/ATLAS kometası iyulun 1-də aşkarlanıb. Sonradan onun başqa bir ulduz sistemindən Günəş sisteminə daxil olduğu müəyyən edilib. Kometanın komasının diametri təxminən 24 kilometr olaraq qiymətləndirilir. Kompüter modelləşdirmələrinə əsasən, obyektin yaşı 7,5 milyard ildən çoxdur. Bu isə onu Günəşdən təxminən 3 milyard il daha qədim və indiyədək müşahidə edilmiş ən qədim kosmik obyektlərdən biri edə bilər.
