ABŞ-da yüngül mühərrikli təyyarənin pilotu uçuş zamanı səmada naməlum uçan obyekt (NLO) müşahidə etdiyini bildirib. AzPost xəbər verir ki, bu barədə New York Post (NYP) nəşri məlumat yayıb.
Qeyd olunur ki, ABŞ sosial şəbəkə seqmentində Piper PA-32RT-300T Turbo Lance II tipli təyyarənin pilotu ilə hava hərəkətini idarə edən dispetçer arasında aparılan danışığın audioyazısı yayılıb. Pilot sözügedən obyekti Rod-Aylend ştatı üzərində uçuş zamanı, təyyarəsinin bir neçə metrliyində gördüyünü bildirib.
Danışıq zamanı pilot naməlum obyekti gümüşü rəngdə, konteyner və ya kapsula bənzər formada təsvir edib. Onun sözlərinə görə, obyekt hərəkətsiz vəziyyətdə havada dayanıb və təyyarəyə olduqca yaxın məsafədə yerləşib.
Dispetçerlər obyektin ölçüləri və görünüşü ilə bağlı əlavə məlumat istədikdə, pilot bunu “təəccüblü” adlandırıb. O bildirib ki, naməlum obyekt heç bir şeyə bağlı olmayıb və sadəcə havada “asılı vəziyyətdə” dayanıb.
Hadisə ilə bağlı rəsmi qurumlar tərəfindən əlavə açıqlama verilməyib.
