İrana qarşı səsləndirilən təhdidlər fonunda rəsmi Tehrandan sərt açıqlama gəlib.
AzPost xəbər verir ki, İranın ali rəhbəri Ayətullah Əli Xameneinin müşaviri Əli Şamxani ABŞ prezidenti Donald Trampın bəyanatlarına cavab verib. O bildirib ki, İrana qarşı istənilən təcavüz dərhal və çox sərt cavabla qarşılanacaq.
Şamxaninin sözlərinə görə, İranın raket imkanları və müdafiə gücü heç bir xarici təsir və ya icazədən asılı deyil. O vurğulayıb ki, ölkənin hərbi potensialını məhdudlaşdırmaq mümkün deyil.
Müşavir qeyd edib ki, İrana qarşı atılacaq hər hansı aqressiv addım gözləniləndən də ağır nəticələrə səbəb olacaq.
Əli Şamxani bu fikirləri sosial şəbəkə hesabında paylaşdığı açıqlamada səsləndirib. Onun sözlərinə görə, İran öz təhlükəsizliyini qorumaq üçün bütün imkanlara malikdir. Rəsmi Tehran regionda gərginliyi artıran bəyanatları məsuliyyətsiz adlandırır.
İran tərəfi dəfələrlə bəyan edib ki, ölkənin müdafiə siyasəti sırf özünü qoruma məqsədi daşıyır. Bununla belə, hər hansı təzyiq və ya hücum cəhdi cavabsız qalmayacaq.
Rəsmi şəxslər bildirirlər ki, İran öz milli maraqlarını qətiyyətlə müdafiə edəcək.
