Yumurta gündəlik qidalanmada ən çox istifadə olunan və ən əlçatan protein mənbələrindən biridir. Lakin illərdir müzakirə olunan əsas sual dəyişməz qalır: yumurtanı çiy içmək daha faydalıdır, yoxsa bişmiş halda yemək? Mütəxəssislərin və aparılan elmi araşdırmaların nəticələri bu məsələyə aydınlıq gətirir.
AzPost xəbər verir ki, dietoloqlar və qidalanma üzrə mütəxəssislər yumurtanın çiy halda qəbulunun sağlamlıq baxımından ciddi risklər daşıdığını bildirirlər. Əsas təhlükə salmonella bakteriyası ilə yoluxma ehtimalıdır. Bu bakteriya həm yumurtanın qabığında, həm də daxili hissəsində ola bilər və xüsusilə uşaqlar, yaşlılar və immun sistemi zəif olan şəxslər üçün ağır fəsadlara səbəb ola bilər.
Mütəxəssislərin fikrincə, çiy yumurtanın daha faydalı olması ilə bağlı yayılan fikirlər elmi əsaslara söykənmir. Əksinə, aparılan tədqiqatlar göstərir ki, yumurta bişirildikdə onun tərkibindəki zülal orqanizm tərəfindən daha effektiv mənimsənilir. Belə ki, elmi araşdırmalara əsasən, bişmiş yumurtadakı zülalın mənimsənilmə faizi təxminən 90 faizdən çox olduğu halda, çiy yumurtada bu göstərici 50 faizə belə çatmır.
Bu isə o deməkdir ki, əzələ kütləsinin qorunması, enerji səviyyəsinin yüksəldilməsi və ümumi qidalanma keyfiyyəti baxımından yumurtanın bişmiş forması daha üstündür. Termik emal zamanı bəzi vitaminlərin qismən azalması ehtimalı olsa da, zülalın yüksək mənimsənilməsi bu itkini kompensasiya edir.
Mütəxəssislər bildirirlər ki, yumurtanı təhlükəsiz şəkildə qəbul etməyin ən doğru yolu onu qaynatmaq, qızartmaq və ya digər termik üsullarla bişirməkdir. Çiy yumurtadan imtina etməyənlərə isə yalnız təzə və yoxlanılmış məhsullardan istifadə etmək, həmçinin gigiyenik qaydalara ciddi əməl etmək tövsiyə olunur.
