Qarabağdakı dağıdılmış separatçı guruhun başçılarına Bakıda bu gün hökm oxundu.
Onların məhkəməsi həm də Azərbaycan tarixinin 35 illik səhifəsini bağladı.
“Allah baisin evini yıxsın!”
Belə bir qarğışı var bizim xalqın…
Sıra ilə düzülüb hakimin hökmlü səsi ilə ayağa qalxıb boğuq, ölgün səslə bir-bir adlarını deyən, barəsində kəsilmiş hökmü dinləyən bu başkəsənlər son 35 ildə Azərbaycan xalqının yaşadığı ağır, qanlı günlərinin səbəbkarlarıdır.
Bizə “Ağla, qərənfil ağla” oxutduran, Xocalıda bizi tikə-tikə edən, Şuşada kabab çəkib hırıldaya-hırıldaya rəqs edənlərdir.
Kiplinqin “Mauqli”sindəki Tabakiləridir.
Bu əclaf yığınına görə, Azərbaycan xalqı 35 ildə 50 min şəhid verdi, milyonlarla adam yerindən-yurdundan didərgin düşdü…
Ölkənin, adamların düzəni pozuldu.
Bunların əli ilə Qarabağ eli dağıldı.
Bunların əli ilə ölkəmiz az qala parça-parça olacaqdı.
Bunlara görə, qardaş qırğınına tuş gəldik…
İndi şüşə arxasında oturub gözlərində dəhşət bizə baxırlar…
Onları necə bağışlamaq olar?
Bu şərəfsiz idbarların miras qoyduğu qara tarixin səhifələrindən onların süzülən qanlı izləri qalır.
Bu azğınların ideoloji babaları – Ter-Petrosyan, Robert Koçaryan, Serj Sarkisyan, Zori Balayan, Aqanbekyan sağdırlar.
Onların da bu cərgədə duracağı gün olacaq.
…İndi dönüb geriyə baxanda nakam getmiş yüz minlərlə insanın qüssəli hekayələri, məhv olmuş talelər, Şəhid olmuş laydivar oğulların kədərli gözləri sənə baxır.
Təsəlli olan odur ki, bu idbarlar layiqli cəzalarını almaq üçün əlibağlı Azərbaycan xalqının qarşısında durdular.
Həmin günün Şahidləri olmaq gözəl hissdir.
Qalib komandan, Qəhrəman Ordu və Əziz Şəhidlərimiz bu hissi bizə bəxş edənlər oldu.
Bakıda keçirilmiş “Nürenberq prosesi” Azərbaycana düşmən kəsilənlərə bir ibrət olmalıdır.
Xaqani SƏFƏROĞLU
