Baku Electronics-in onlayn satış xidməti ilə bağlı daha bir narazılıq gündəmə gəlib. AzPost xəbər verir ki, sosial şəbəkə istifadəçisi Leyla Abadova bildirib ki, şirkətdən onlayn sifarişlə aldığı Yoshiro markalı termopot ilk yoxlama zamanı nasaz çıxıb.
İstifadəçinin sözlərinə görə, məhsul çatdırıldıqdan sonra yoxlanılıb və məlum olub ki, termopotun suyu süzmə düyməsi işləmir, ehtimal ki, nasosda problem var. Bununla bağlı müştəri xidmətinə müraciət edilsə də, ona israrla mağazaya yaxınlaşması tövsiyə olunub.
Lakin mağazaya gedən zaman vəziyyət daha da mürəkkəbləşib. Məlum olub ki, müştəri düzgün istiqamətləndirilməyib və nəticədə ona bildirilib ki, məhsulu artıq “istifadə etdiyi” üçün geri qaytarmaq mümkün deyil. Baku Electronics əməkdaşları termopotun içinə su tökülməsini əsas gətirərək, müştərini servislə əlaqə saxlamağa yönləndiriblər.
Narazı müştəri isə haqlı sual qoyur:
“Çayniki və ya termopotu su tökmədən necə yoxlamaq olar? İçinə su tökməsəydim, suyu süzmədiyini haradan biləcəkdim?”
Leyla Abadova qeyd edir ki, Baku Electronics-in daimi müştərisi olsa da, bu yanaşma onu ciddi şəkildə məyus edib. O, nə məhsuldan, nə də müştəri xidmətlərinin davranışından razı qaldığını bildirərək, sözügedən termopotları heç kimə tövsiyə etmədiyini vurğulayıb.
Qeyd edək ki, “İstehlakçıların hüquqlarının müdafiəsi haqqında” Azərbaycan Respublikasının Qanununa əsasən, istehlakçı məhsulu yalnız funksional vəziyyətini yoxlamaq məqsədilə istifadə etdikdə bu, “istifadə olunmuş məhsul” sayılmır. Qanunvericiliyə görə, istehsal qüsuru olan məhsulun dəyişdirilməsi və ya geri qaytarılması satıcının birbaşa öhdəliyidir.
Məsələ ilə bağlı Baku Electronics-in mövqeyini öyrənmək mümkün olmayıb.
