İran rəsmiləri ABŞ-ın pilotu xilas etmək məqsədilə həyata keçirdiyi əməliyyata kəskin reaksiya veriblər. Rəsmi Tehran bu addımı hərbi əməliyyatdan çox, əvvəlcədən hazırlanmış “ssenari” adlandırıb.
AzPost xəbər verir ki, bu barədə İranın vitse-prezidenti İsmayıl Səqab İsfahani yerli mediaya açıqlamasında bildirib.
“Sanki böyük bir ssenari alt-üst oldu”
İsfahan səmasında baş verənlərə toxunan vitse-prezident, ABŞ-ın iddialarının reallığı əks etdirmədiyini vurğulayıb: “Bizim İsfahanımızın səması yalnız bir neçə təyyarənin düşürülməsinə şahidlik etmədi. Sanki böyük bir ssenari alt-üst oldu. Bəlkə də bu əməliyyat heç vaxt ‘xilas etmə’ məqsədi daşımayıb”.
İsfahani qeyd edib ki, ABŞ-ın xüsusi xidmət orqanları tərəfindən idarə olunan bu “tamaşa” əslində başqa məqsədlərə xidmət edirdi. Onun sözlərinə görə, İran hava hücumundan müdafiə sistemlərinin çevikliyi sayəsində bu plan iflasa uğrayıb.
Xatırladaq ki, İsfahan bölgəsi İranın strateji nüvə və hərbi obyektlərinin yerləşdiyi ən mühüm nöqtələrdən biri hesab olunur. Rəsmi Tehran bu cür cəhdlərin ölkənin suverenliyinə təhdid olduğunu və hər hansı təcavüzə qətiyyətlə cavab veriləcəyini bəyan edib.
