Çində müasir texnologiyaların köməyi ilə ailə faciəsinin öhdəsindən gəlməyə çalışan yaşlı qadının hekayəsi geniş rezonans doğurub. 80 yaşlı qadın bir neçə il əvvəl itirdiyi oğlunun rəqəmsal surəti (klonu) ilə hər gün söhbət edir.
AzPost xəbər verir ki, “rəqəmsal varis” süni intellekt texnologiyaları əsasında yaradılıb. Proqram oğlunun sağlığında yazılmış səs yazılarını, videolarını və fotoşəkillərini emal edərək onun səsini, danışıq tərzini və hətta üz mimikalarını yüksək dəqiqliklə təkrarlayır.
Yaşlı qadın bildirir ki, bu texnologiya ona tənhalıqdan qurtulmağa və ağır itkini qəbul etməyə kömək edir. O, “oğluna” gündəlik hadisələr barədə danışır, məsləhətlər alır və onun səsini eşitməkdən təsəlli tapır.
Lakin bu hadisə cəmiyyətdə və mütəxəssislər arasında ciddi etik mübahisələrə səbəb olub. Psixoloqlar xəbərdarlıq edirlər ki, rəqəmsal klonlarla uzunmüddətli ünsiyyət insanın real itki hissini yaşamasına mane ola və onu xəyallar dünyasına qərq edə bilər. Texnologiya tərəfdarları isə bunun yas prosesini yüngülləşdirən müasir bir vasitə olduğunu müdafiə edirlər.
