Şimali Koreya
Şimali Koreya “Xvason” qitələrarası ballistik raketləri ilə ABŞ-ın hava hücumundan müdafiə (HHM) sistemlərini aşmaq potensialını artırır.
AzPost.info xəbər verir ki, bu barədə “Bloomberg” agentliyi təhlil yayımlayıb.
Məqalədə qeyd olunur ki, Pxenyan nüvə arsenalını sürətlə genişləndirməklə yanaşı, raket texnologiyalarını inkişaf etdirərək bu silahların tətbiq imkanlarını artırır. Hazırda əsas faktor təkcə döyüş başlıqlarının sayı deyil, həm də onların hədəfə çatdırılma vasitələridir.
Son nəsil “Xvason” seriyalı qitələrarası raketlər eyni vaxtda çox sayda hədəfin buraxılmasına şərait yaradır. Ekspertlərin fikrincə, Şimali Koreya proqramı elə bir mərhələyə qədəm qoyur ki, burada kütləvi tətbiq imkanı ön plana çıxır. Bu isə ABŞ-ın Hava Hücumundan Müdafiə sistemlərini həddindən artıq yükləyərək sıradan çıxara və ya effektivliyini azalda bilər.
Təhlildə vurğulanan əsas məqamlar:
-
Arsenalın böyüməsi: Mövcud templər saxlanılarsa, yaxın illərdə Pxenyanın nüvə arsenalı inkişaf etmiş nüvə dövlətlərinin səviyyəsinə yaxınlaşacaq.
-
Yaxın mənzilli təhlükə: Ölkə artıq Asiyadakı ABŞ müttəfiqlərini və hərbi obyektlərini vura biləcək xeyli sayda yaxın mənzilli raketə sahibdir.
-
İstehsal gücü: Döyüş başlıqları üçün material istehsalının ildə bir neçə onlarla vahidə çatdığı təxmin edilir.
Mütəxəssislər qeyd edirlər ki, Şimali Koreyanın raket proqramındakı bu irəliləyiş bölgədəki strateji balansı dəyişə bilər və Vaşinqtonu öz müdafiə doktrinasına yenidən baxmağa məcbur edir.
