Sumqayıt şəhərinin girişinə yaxın, sakinlərin “Meronun arxası” kimi tanıdığı yaşayış massivində vəziyyət artıq dözülməz həddə çatıb.
Azpost.info bildirir ki, təxminən 700-dən çox fərdi yaşayış evinin yerləşdiyi, ümumi uzunluğu 1 kilometrə yaxın olan bu ərazidə insanlar illərdir ən vacib kommunal problemlərdən biri – kanalizasiya sisteminin olmaması ilə üz-üzədir.
Sakinlərin sözlərinə görə, son 8 il ərzində dəfələrlə kanalizasiya xəttinin çəkiləcəyi vəd edilsə də, bu vədlər kağız üzərində qalıb. Bu ilin mart ayından etibarən davam edən intensiv yağışlar isə problemi daha da kəskinləşdirib. Hazırda küçələr, həyətlər və ətraf ərazilər su altında qalıb, yaşayış massivi faktiki olaraq bataqlığa çevrilib.
Vəziyyəti ağırlaşdıran əsas səbəblərdən biri də ərazinin sonunda yerləşən “Coca Cola” və “Azərsun”un anbarı, həmçinin stəkan istehsalı sexinin tullantı və texniki sularını nasoslar vasitəsilə boş sahələrə axıtmasıdır. Kanalizasiya sisteminin olmaması səbəbindən həmin sular yağış suları ilə qarışaraq ərazidə böyük gölməçələr və bataqlıq sahələri yaradıb və torpaq sudan doyub.
Nəticədə sakinlər yalnız hərəkət çətinliyi ilə deyil, həm də ciddi sanitariya problemləri ilə üzləşiblər. Qurbağa və ağcaqanadların sürətlə çoxalması insanların gündəlik həyatını iflic edib. Xüsusilə uşaqlar, yaşlılar və xəstə insanlar üçün vəziyyət ciddi narahatlıq doğurur.
Ən acınacaqlı məqam isə odur ki, yüzlərlə ailənin yaşadığı bu ərazinin problemi illərdir həllini tapmır. Aidiyyəti qurumlar verilən vədlərin arxasında dayanmalı, kanalizasiya infrastrukturunun qurulması və ərazidə yığılan suların təxirəsalınmaz şəkildə kənarlaşdırılması üçün konkret tədbirlər görməlidirlər.
Sakinlər aidiyyəti qurumların nəhayət bu vəziyyətə biganə qalmayacağına ümid edirlər. Bu gün suyun içində qalan insanlar yalnız bir sual verir: 700-dən çox ailənin yaşadığı ərazi daha neçə il kanalizasiyasız və baxımsız qalmalıdır?
Problemin miqyasını əks etdirən görüntünü təqdim edirik.
