Bakıda Qafqaz Müsəlmanları İdarəsinin sədri Allahşükür Paşazadə ilə Türk Akademiyasının prezidenti, akademik Şahin Mustafayev arasında görüş keçirilib.
AZPOST xəbər verir ki, bu barədə Türk Akademiyası məlumat yayıb.
Görüş zamanı Allahşükür Paşazadə Qafqaz Müsəlmanları İdarəsinin həyata keçirdiyi elmi-praktik tədbirlər barədə məlumat verib.
Şahin Mustafayev isə Türk Akademiyasının əsas fəaliyyət istiqamətlərini təqdim edib, həyata keçirilən beynəlxalq elmi layihələr, eləcə də qurumun nəşriyyat fəaliyyəti və əldə olunan nəticələr barədə danışıb.
Tərəflər görüşdə gələcək əməkdaşlıq perspektivlərini müzakirə edərək, türk xalqlarının ortaq tarixi və mədəni irsinin qorunması və təbliği istiqamətində birgə elmi və mədəni layihələrin, eləcə də müxtəlif tədbirlərin həyata keçirilməsində qarşılıqlı maraqlı olduqlarını bildiriblər.
Görüşün sonunda Şahin Mustafayev Allahşükür Paşazadəyə Türk Akademiyası tərəfindən hazırlanaraq nəşr olunmuş, Qaraxanilər dövrünə aid “İlk Qaraxani Quranı”nın – Quranın türk dilinə ən qədim tərcümələrindən birinin nəşr edilmiş nüsxəsini hədiyyə edib.
