“Biletim.az” portalı istifadəçilərin rahatlığını artırmaq məqsədilə tətbiq və internet saytında bir sıra yeni funksiyalar istifadəyə verib.
AYNA-dan Azpost.info-ya verilən məlumatda deyilir ki, yeniliyə əsasən, artıq “biletim.az” tətbiqi və saytı vasitəsilə bilet alarkən şəxsiyyət vəsiqəsinin seriya nömrəsi və FIN kodunu əl ilə daxil etməyə ehtiyac yoxdur. Sərnişinlər şəxsiyyət vəsiqəsini mobil telefon vasitəsilə skan etməklə şəxsi məlumatlarını avtomatik doldura biləcəklər.
Bildirilib ki, yeni funksiya bilet alışını daha sürətli və rahat həyata keçirməyə imkan verir.
Tətbiqdə digər yeniliklər xəritə və dayanacaqlar bölmələrini də əhatə edir. Aparılan təkmilləşdirmələr nəticəsində sərnişinlər xəritə üzərindən marşrut avtobuslarının real vaxt rejimində yerini, son dayanacağa çatma müddətini və digər məlumatları izləyə biləcəklər.
Bundan əlavə, dayanacaqlar bölməsində avtobusların minik məntəqələrinin ünvanı və əlaqə nömrələri də istifadəçilərə təqdim olunacaq.
Xatırladaq ki, daha əvvəl “biletim.az” portalında daha bir yenilik tətbiq edilmişdi. Belə ki, istifadəçilər artıq gediş və dönüş istiqamətləri üzrə biletləri eyni vaxtda əldə edə bilirlər. Əvvəllər sistem vasitəsilə yalnız bir istiqamətə bilet almaq mümkün idi.
Hazırda “biletim.az” portalı vasitəsilə 58 məntəqəyə 94 istiqamət üzrə bilet almaq mümkündür. Sistemə 372 reys və 420 nəqliyyat vasitəsi inteqrasiya olunub.
