Azərbaycan Xarici İşlər Nazirliyi (XİN) Fransanın Avropa və Xarici İşlər Nazirliyinin Fransa vətəndaşı Martin Rayan barəsində çıxarılmış məhkəmə hökmü ilə bağlı 30 iyul tarixli bəyanatına sərt reaksiya verib.
XİN-in mətbuat katibi Ayxan Hacızadənin şərhində bildirilib ki, Fransa tərəfinin məhkəmə prosesini şübhə altına alan və Azərbaycana qarşı əsassız ittihamlar irəli sürən bəyanatı qətiyyətlə rədd edilir.
Qeyd olunub ki, Martin Rayan barəsində cinayət işi Azərbaycan Respublikasının qanunvericiliyinə uyğun araşdırılıb və məhkəmə təqdim olunan sübutlar, eləcə də irəli sürülən ittihamlar əsasında qərar qəbul edib. Apellyasiya instansiyasının qərarı da ölkə qanunvericiliyi çərçivəsində keçirilmiş məhkəmə prosesinin nəticəsi olub.
XİN vurğulayıb ki, Fransanın məhkəmə prosesinə siyasi don geyindirməsi, Azərbaycan məhkəmələrinin fəaliyyətinə müdaxilə xarakteri daşıyan bəyanatlar verməsi, “əsassız saxlanılma” və “ədalətsiz məhkəmə araşdırması” ilə bağlı iddialar səsləndirməsi qəbuledilməzdir.
Ayxan Hacızadə qeyd edib ki, məhkəmə prosesi zamanı təqsirləndirilən şəxsin bütün prosessual hüquqları Azərbaycan qanunvericiliyinə və ölkənin beynəlxalq öhdəliklərinə uyğun şəkildə təmin edilib. O bildirib ki, Fransanın Azərbaycandakı səfirliyinin konsulluq nümayəndələrinin bütün məhkəmə iclaslarında iştirak etməsi də prosesin şəffaf keçirildiyini təsdiqləyir.
Sonda Xarici İşlər Nazirliyi Fransa tərəfini Azərbaycanın suverenliyinə, daxili işlərinə və müstəqil məhkəmə sisteminə hörmət etməyə, həmçinin ikitərəfli münasibətlərə zərər vuran əsassız ittihamlardan çəkinməyə çağırıb.
