Dərin yuxu
Yanlış yuxu vəziyyəti onurğaya əlavə yük salaraq bel və boyun ağrılarına səbəb ola bilər. Mütəxəssislər sağlam yuxu üçün bədənin düzgün vəziyyətdə olmasının vacibliyini vurğulayırlar.
Azpost.info xəbər verir ki, bu barədə The Mirror nəşri məlumat yayıb.
Fizioterapevt Semmi Marqonun sözlərinə görə, insanların əksəriyyəti dörd əsas vəziyyətdən birində yatır: sağ və ya sol böyrü üstə, üzüaşağı və ya arxası üstə.
Mütəxəssis baş, boyun və onurğanın eyni xətt üzərində qalmasını təmin edən neytral vəziyyətdə yatmağı tövsiyə edir. Bu, onurğaya düşən yükü azaldır və bədənin bərabər dəstəklənməsinə kömək edir.
Semmi Marqo xüsusilə üzüaşağı yatmağı sevənlərə xəbərdarlıq edib. Onun sözlərinə görə, başın uzun müddət yana çevrilmiş vəziyyətdə qalması boyun nahiyəsində gərginlik yaradır və zamanla ağrılara səbəb ola bilər.
Arxası üstə yatanlara da diqqətli olmaq tövsiyə olunur. Ayaqların tam düz vəziyyətdə saxlanılması belin aşağı hissəsinə əlavə yük yarada bilər. Bu səbəbdən dizlərin altına kiçik yastıq qoymaq və ya ayaqları bir qədər bükülü vəziyyətdə saxlamaq daha faydalıdır.
Fizioterapevt bel ağrılarının qarşısını almaq üçün bədənin formasını alan “memory foam” (yaddaş effektli) döşəklərdən istifadə etməyi də məsləhət görür. Belə döşəklər təzyiqi bərabər paylayaraq onurğaya daha yaxşı dəstək verir.
Məqalədə yuxunun keyfiyyətinə mənfi təsir göstərən qidalar da sadalanıb. Bunlara aşağıdakılar daxildir:
- kofein tərkibli qəhvə, çay, şokolad və enerji içkiləri;
- yağlı və fast-food məhsulları;
- şəkərli qidalar və şirniyyatlar;
- qırmızı ət;
- acılı yeməklər;
- spirtli içkilər.
Mütəxəssislər bildirirlər ki, bu məhsullar yatmazdan əvvəl qəbul edildikdə yuxuya getməyi çətinləşdirə, həzmi ləngidə və gecə yuxusunun keyfiyyətini aşağı sala bilər.
