Tibbi Yardım
2026-cı ilin ilk yarısında Azərbaycanda tibbi sığorta bazarında diqqətçəkən dəyişiklik qeydə alınıb. Sığorta şirkətlərinin topladığı haqlar ötən ilin eyni dövrü ilə müqayisədə cüzi azalsa da, sığorta hadisələri üzrə ödənişlərin həcmi artıb. Bu da tibbi sığorta üzrə ödəniş yükünün yüksəldiyini göstərir.
Mərkəzi Bankın statistik məlumatlarına əsasən, 2026-cı ilin yanvar-iyun aylarında tibbi sığorta növü üzrə yığılan sığorta haqları 87 milyon 335 min manat təşkil edib.
Bu, 2025-ci ilin eyni dövrü ilə müqayisədə 1 milyon 24 min manat və ya 1,2 faiz azdır. Ötən ilin ilk yarısında tibbi sığorta üzrə yığımlar 88 milyon 359 min manat olmuşdu.
Bununla yanaşı, sığorta ödənişlərində artım müşahidə olunub. Hesabat dövründə tibbi sığorta üzrə ödənilən vəsait 46 milyon 89 min manata çatıb. Bu göstərici ötən ilin eyni dövründə qeydə alınan 42 milyon 510 min manat ilə müqayisədə 3 milyon 579 min manat və ya 8,4 faiz çoxdur.
Statistika göstərir ki, sığorta şirkətlərinin ödəniş yükü də artıb. Belə ki, 2026-cı ilin ilk altı ayında tibbi sığorta üzrə toplanan hər 100 manat sığorta haqqının 52,8 manatı ödəniş kimi geri qaytarılıb.
Müqayisə üçün qeyd edək ki, 2025-ci ilin eyni dövründə bu göstərici 48,1 manat təşkil edirdi.
Mütəxəssislərin fikrincə, ödəniş əmsalının yüksəlməsi tibbi sığortadan istifadə hallarının artdığını və sığorta şirkətlərinin üzərinə düşən maliyyə yükünün əvvəlki illə müqayisədə çoxaldığını göstərir. Bu dinamika gələcək dövrdə tibbi sığorta bazarında risklərin idarə olunması və tarif siyasəti baxımından da mühüm göstəricilərdən biri hesab olunur.
