2026-cı ilin ilk altı ayında Rusiyaya səfər edən əcnəbilərin sayı ötən ilin eyni dövrü ilə müqayisədə 700 min nəfər azalıb.
Bu barədə Rusiya Federal Təhlükəsizlik Xidmətinin (FSB) Sərhəd Xidmətinin Vahid İdarələrarası İnformasiya-Statistika Sistemində dərc olunan məlumatlarına istinadən “Kommersant” qəzeti məlumat yayıb.
Statistikaya görə, 2026-cı ilin yanvar–iyun aylarında xarici ölkə vətəndaşları Rusiyaya 7,1 milyon dəfə səfər edib. Müqayisə üçün qeyd edək ki, 2025-ci ilin eyni dövründə bu göstərici 7,8 milyon idi.
Rusiyaya ən çox səfər edənlər arasında Özbəkistan vətəndaşları liderliyini qoruyub. İlk onluqda Çin, Qazaxıstan və Tacikistan da yer alıb.
Turizm məqsədilə Rusiyaya ilk altı ayda 676,4 min nəfər gəlib. Onların böyük əksəriyyəti – 380,5 min nəfər – Çin vətəndaşları olub. Sonrakı yerlərdə Türkmənistan (46 min), Türkiyə (36,9 min) və Səudiyyə Ərəbistanı (20,6 min) vətəndaşları qərarlaşıb.
İşləmək məqsədilə Rusiyaya gələn əcnəbilərin sayı isə 2,4 milyon olub. Ən böyük qrupu Özbəkistan (1,1 milyon), Tacikistan (494 min) və Qırğızıstan (289 min) vətəndaşları təşkil edib.
Bundan başqa, 202 min nəfər təhsil almaq üçün Rusiyaya gəlib. Təxminən 2,3 milyon səfər isə “şəxsi məqsədli” kimi qeydə alınıb. Bu kateqoriyada əsasən Qazaxıstan, Özbəkistan və Abxaziyadan gələnlər üstünlük təşkil edib.
Rusiya Təhlükəsizlik Şurasının məlumatına əsasən, 2026-cı ilin may ayında ölkədə 6,1 milyon xarici vətəndaş olub. Bu da ötən ilin eyni dövrü ilə müqayisədə 700 min nəfər azdır. Aprelin 1-nə olan məlumata görə isə qüvvədə olan əmək patentinə malik əcnəbilərin sayı 1,7 milyon nəfər təşkil edib.
Ekspertlər hesab edirlər ki, əcnəbilərin sayındakı azalma son illərdə Rusiyada miqrasiya nəzarətinin əhəmiyyətli dərəcədə sərtləşdirilməsi ilə bağlıdır.
Belə ki, 2025-ci ildə ölkədə “nəzarətdə olan şəxslər” reyestri yaradılıb. Bu siyahıya daxil edilən əcnəbilərə bank hesablarının bloklanması və deportasiya da daxil olmaqla müxtəlif məhdudiyyətlər tətbiq olunur.
Moskva və Moskva vilayətində bəzi miqrantlar mobil tətbiq vasitəsilə olduqları yer barədə məlumat verməyə məcbur edilib. 2026-cı ildən isə Rusiyada 90 gündən artıq qalacaq əcnəbilər üçün İİV (HİV) infeksiyası və narkotik istifadəsi ilə bağlı məcburi testlər tətbiq olunub.
Bundan əlavə, avqust ayında Rusiya Prezidenti Vladimir Putin inzibati xətaların siyahısını genişləndirən qanunu imzalayıb. Yeni qaydalara əsasən, daha çox hüquq pozuntusuna görə əcnəbilərin deportasiya edilməsi mümkün olacaq.
