Almaniyada 15–24 yaş arasında olan gənclərin sayı rekord dərəcədə azdır. Ölkədə gənclərin ümumi əhalidə payı cəmi 10 faiz təşkil edir. Miqrasiya olmasaydı, bu göstərici daha da aşağı olardı.
Almaniyanın Federal Statistika İdarəsinin məlumatına görə, bu antirekord 2021-ci ildən qorunub saxlanılır.
Gənclərin ölkə əhalisində ən yüksək paya malik olduğu dövr isə 1980-ci illər olub. Həmin vaxt Almaniyada təxminən hər altı nəfərdən biri 15–24 yaş arasında idi.
Miqrantların payı olmasaydı, göstərici daha da aşağı olardı
Xarici vətəndaşlar və 1950-ci ildən sonra Almaniyaya köçən şəxslərin uşaqları arasında gənclərin payı daha yüksəkdir. Bu qrupda 15–24 yaşlıların nisbəti təxminən 12,2 faizdir.
Statistik məlumatlara əsasən, miqrantlar olmasaydı, Almaniyada gənclərin payı hazırkı 10 faizdən də aşağı olardı.
Almaniyanın bəzi bölgələrində gənclər daha çoxdur
Demoqraflar ölkə daxilində də ciddi regional fərqlər müşahidə edirlər.
Gənclərin ən yüksək payı Bremen, Hamburq və Baden-Vürtemberq əyalətlərində qeydə alınır.
Keçmiş Şərqi Almaniya ərazilərində isə 15–24 yaşlı gənclərin orta göstəricisi ölkə üzrə ümumi səviyyədən aşağıdır.
Bu rəqəmlər Almaniyanın üzləşdiyi demoqrafik yaşlanma problemini bir daha gündəmə gətirir. Gənclərin əhali içərisində payının azalması gələcəkdə əmək bazarı, sosial təminat sistemi və pensiya sistemi üçün əlavə təzyiq yarada bilər.
Sunay Aydın
