Xəbər verildiyi kimi, “Orta Asiya və Güney Qafqaz Söz Azadlığı Şəbəkəsi” İctimai Birliyi Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “Şuşa Bəyannaməsindən Türk Dövlətləri Təşkilatına” adlı layihəni icra edir. Layihə çərçivəsində bir sıra tədbirlərin həyata keçirilməsi nəzərdə tutulub və artıq bu işlərin bir qisminə start verilib. Layihə çərçivəsində rəsm müsabiqəsi də keçirilir. Müsabiqə ilə bağlı elanlar verilib və qeydiyyat prosesi davam edir.
Bunu CASCFEN-in Mətbuat xidmətinə açıqlamasında təşkilatın sədri Nadir Azəri deyib.
Nadir Azəri bildirib ki, bu günə qədər müsabiqədə iştirak etmək istəyən 40-a yaxın şəxs qeydiyyatdan keçib:
“Qeydiyyat davam edir. Amma mən hesab edirəm ki, bu müsabiqədə iştirak etmək istəyənlər tələsməlidirlər. Çünki bu gün artıq ayın 10-dur və müsabiqə üzrə sənəd qəbulu sentyabrın 20-də başa çatacaq. Buna görə də qeydiyyatdan sonra rəsm əsərini hazırlamağa başlayan şəxslər işlərini vaxtında çatdırmaya bilərlər.
Mən buradan bir məsələni də xüsusilə hər kəsin diqqətinə çatdırmaq istəyirəm. Bəzən bizə kənardan müraciət edənlər deyirlər ki, müsabiqədə iştirak edirlər. Mən də soruşuram: qeydiyyatdan keçmisinizmi? Cavab verirlər ki, xeyr. Halbuki müsabiqədə iştirak etmək üçün mütləq qeydiyyatdan keçmək lazımdır. Biz elanda da qeyd etmişik ki, qeydiyyat üçün göstərilən nömrə (+994552639944) ilə əlaqə saxlanılmalıdır.
Qeydiyyat üçün başqa heç bir sənəd və ya prosedur tələb olunmur. Sadəcə elanda göstərilən nömrəyə zəng edərək, yaxud mesaj yazaraq iştirak edəcək şəxsin adı, soyadı, ata adı, yaşı, harada oxuduğu və ya çalışdığı barədə məlumat verilməsi kifayətdir. Bundan sonra Təşkilat Komitəsi həmin şəxsi qeydiyyata alır”.
N.Azəri deyib ki, elanda da göstərildiyi kimi, sentyabrın 20-də sənədlərin qəbulu başa çatır: “Elanımızda konkret saat qeyd etməmişdik. Lakin bu açıqlama vasitəsilə bir daha diqqətə çatdırmaq istəyirəm ki, sentyabrın 20-si saat 18:00-da müsabiqəyə sənəd qəbulu tam başa çatacaq.
Bir daha hər kəsdən xahiş edirəm ki, bunu nəzərə alsın. Müsabiqədə iştirak etmək üçün mütləq qeydiyyatdan keçmək lazımdır. Qeydiyyatdan keçməyən şəxslərin müsabiqədə iştirakı ilə bağlı ciddi problem yarana bilər. Çünki Təşkilat Komitəsi qeydiyyatdan keçməyən şəxsləri müsabiqəyə buraxmaya bilər.
Ona görə də müsabiqədə iştirak etmək istəyən hər kəsdən xahiş edirəm ki, elə bu gün və ya sabah qeydiyyatdan keçsin. Xüsusilə rəsm əsərlərini artıq hazırlayan, lakin qeydiyyatdan keçməyən şəxslərə müraciət edirəm ki, qeydiyyat məsələsini də tamamlasınlar. Sonda müsabiqədə iştirak edən hər bir kəsə uğurlar arzulayıram. Əminəm ki, Türk dünyasına xidmət edən bu rəsm müsabiqəsi Azərbaycanda böyük əks-səda doğuracaq.”
