Emal olunmuş ət, hətta az miqdarda istehlak edildikdə belə, yüksək natrium tərkibinə görə hipertoniya riskini artıra bilər.
Yüksək arterial təzyiq ürək-damar xəstəliklərinin əsas risk faktorlarından biri hesab olunur. Təzyiqə yalnız həyat tərzi deyil, gündəlik qidalanma da təsir göstərir. Bəzi gündəlik istifadə etdiyimiz məhsullar duz qəbulunu əhəmiyyətli dərəcədə artıraraq orqanizmə əlavə yük yarada bilər.
Bu barədə EatingWell yazır.
Niyə emal olunmuş ət təzyiqə təsir edir?
Mütəxəssislərin mümkün qədər az istifadə etməyi tövsiyə etdiyi məhsullardan biri emal olunmuş ətdir. Buraya vetçina, kolbasa, bekon, müxtəlif ət dilimləri və digər oxşar məhsullar daxildir.
Araşdırmaların məlumatlarına görə, hətta az miqdarda emal olunmuş ətin hər gün istehlak edilməsi hipertoniya riskinin artması ilə əlaqəli ola bilər.
Bu məhsullardakı əsas problem yüksək natrium miqdarıdır. Duz ət məhsullarının dadını yaxşılaşdırmaq, teksturasını qorumaq və saxlama müddətini uzatmaq üçün istifadə olunur.
Məsələn, 85 qram delikates vetçinasında təxminən 750 milliqram natrium ola bilər. Bu isə gündəlik qida ilə qəbul edilməsi tövsiyə olunan miqdarın əhəmiyyətli hissəsidir.
Orqanizmdə natriumun həddindən artıq olması daha çox mayenin saxlanmasına səbəb olur. Nəticədə damarlarda dövr edən qanın həcmi artır və damar divarlarına düşən təzyiq yüksələ bilər.
Ət delikateslərinin tərkibində istifadə olunan nitrat və nitritlər də əlavə diqqət tələb edir. Bu maddələr məhsulun rəngini və dadını qorumaq, həmçinin bakterial çirklənmənin qarşısını almaq üçün istifadə olunur. Mütəxəssislər əlavə konservantlar olan məhsullardan həddindən artıq istifadə etməməyi tövsiyə edirlər.
Emal olunmuş ətdə lif yoxdur
Ət delikateslərinin digər çatışmazlığı onların qida lifləri baxımından çox kasıb olmasıdır.
Lif bağırsaqların normal fəaliyyəti üçün vacibdir və ürək-damar sisteminin sağlamlığının qorunmasında da mühüm rol oynayır.
Qida rasionunda lifin miqdarını artırmaq üçün tərəvəz, meyvə, paxlalılar, mərcimək, noxud və tam taxıllı məhsulların daha çox qəbul edilməsi tövsiyə olunur.
Məhz bu məhsullar arterial təzyiqin normal saxlanmasına kömək edən DASH pəhrizinin əsasını təşkil edir.
Əgər ət delikateslərindən tam imtina etmək çətindirsə, onları liflə zəngin məhsullarla birlikdə qəbul etmək olar. Məsələn, tam taxıllı çörək, təzə tərəvəz, salat və ya avokado ilə birlikdə yemək daha uyğun seçim ola bilər.
Rasiona hansı məhsulları əlavə etmək olar?
Normal arterial təzyiqi qorumaq üçün mütəxəssislər kalium, maqnezium, kalsium və qida lifləri ilə zəngin məhsullara diqqət yetirməyi məsləhət görürlər.
Meyvə və tərəvəzlər, xüsusilə kartof, çuğundur, yarpaqlı göyərti və avokado faydalı seçimlər ola bilər.
Bundan başqa, rasiona paxlalılar, tam taxıllı məhsullar və az yağlı süd məhsulları daxil etmək tövsiyə olunur.
Yağlı balıqları da unutmaq olmaz. Qızılbalıq, siyənək, skumbriya və sardina ürək-damar sistemi üçün faydalı olan omeqa-3 yağ turşuları ilə zəngindir.
Kifayət qədər su içmək də əhəmiyyətlidir. Normal maye qəbulu orqanizmin qan həcmini sabit saxlamağına və artıq natriumun xaric edilməsinə kömək edir.
Bir detalı qeyd edək ki, emal olunmuş ətin istifadəsi ilə hipertoniya arasındakı əlaqə risklə bağlıdır və bu, hər bir insanda mütləq yüksək təzyiq yaranacağı anlamına gəlmir. Arterial təzyiq problemi olan şəxslər fərdi qidalanma tövsiyəsi üçün həkimlə məsləhətləşməlidirlər.
