Rusiyanın ərazisində aparılacaq planlı profilaktik və təmir işləri ilə əlaqədar Ermənistana təbii qazın tədarükü müvəqqəti dayandırılacaq.
Bu barədə “Qazprom Armeniya” QSC məlumat yayıb.
Bildirilib ki, Rusiyanın ərazisində “Şimali Qafqaz–Zaqafqaz” magistral qaz kəmərində kompleks planlı profilaktik və təmir işləri ilə əlaqədar sentyabrın 15-dən 25-dək həmin kəmərlə Ermənistana təbii qazın nəqli müvəqqəti dayandırılacaq.
Şirkətin məlumatına görə, bu müddət ərzində Ermənistanda istehlakçıların fasiləsiz və etibarlı qaz təminatı məhdudlaşdırılmayacaq.
Qaz təchizatının daxili ehtiyatlar və İran İslam Respublikasından əlavə həcmdə tədarük ediləcək təbii qaz hesabına təmin olunacağı bildirilib.
