7–10 yaşlı uşaqlara gündə ən azı 2–3 saat, yeniyetmələrə isə ən azı 1,5 saat gəzintidə olmaq tövsiyə edilir. Bunu nevroloq, tibb elmləri namizədi Yekaterina Demyanovskaya RT-yə müsahibəsində bildirib.
Mütəxəssisin sözlərinə görə, müntəzəm fiziki aktivlik beynin qanla təchizatını dəstəkləməyə, əzələləri möhkəmləndirməyə və dözümlülüyü artırmağa kömək edir. Az hərəkət edən məktəblilər daha tez yorulur və dərs yükünü daha çətin mənimsəyirlər.
Gəzintilər görmə qabiliyyəti üçün də faydalıdır. Uzun müddət kitab oxuyarkən və ya smartfondan istifadə edərkən gözün fokuslanmasını təmin edən əzələlər davamlı gərginlik altında qalır. Açıq havada isə insan daha çox uzağa baxır və bu, həmin əzələlərin rahatlamasına imkan verir.
“Çöldə olarkən baxışların böyük hissəsi uzağa yönəlir. Bu da göz hərəkətlərini təmin edən əzələlərin və göz büllurunun ətrafındakı əzələlərin rahatlamasına şərait yaradır”, – deyə Demyanovskaya izah edib.
Nevroloq qeyd edib ki, aktiv gəzintilər kiçikyaşlı məktəblilərə artıq enerjilərini sərf etməyə və axşam saatlarında həddindən artıq oyanıqlığın qarşısını almağa kömək edir. Yeniyetmələr üçün isə açıq havada vaxt keçirmək dərslərdən uzaqlaşmağa, stressi azaltmağa və fiziki gərginliyi aradan qaldırmağa imkan verir.
Mütəxəssis vurğulayıb ki, yalnız gəzintinin müddəti deyil, fiziki aktivliyin səviyyəsi də vacibdir. Yerimək, qaçmaq və hərəkətli oyunlar oynamaq skamyada oturub smartfondan istifadə etməkdən daha faydalıdır.
Demyanovskaya valideynlərə uşaqların gündəlik rejiminə açıq havada gəzintini mütləq daxil etməyi tövsiyə edib. Onun fikrincə, gəzinti yaxşı oxumağın müqabilində verilən mükafat deyil, uşağın gündəlik həyatının ayrılmaz hissəsi olmalıdır.
Sunay
