Romada Milli Musiqi Günü və dahi bəstəkar, ölkəmizin professional musiqi sənətinin banisi, musiqişünas-alim, Şərqdə ilk operanın müəllifi, ictimai xadim Üzeyir Hacıbəylinin doğum gününə həsr olunmuş tədbir keçirilib.
AZƏRTAC xəbər verir ki, Azərbaycanın İtaliyadakı səfirliyi və Azərbaycanın Romadakı Mədəniyyət Mərkəzinin birgə təşkilatçılığı ilə “Payız sədaları: Azərbaycan operasına ithaf” adlı konsert proqramında diplomatik korpus, akademik dairələr və media nümayəndələri, əcnəbi tələbələr və İtaliyada yaşayan həmyerlilərimiz iştirak ediblər.
Tədbirdə çıxış edən Azərbaycanın İtaliyadakı səfiri Elçin Hüseynli Milli Musiqi Gününün xüsusi əhəmiyyəti və Üzeyir Hacıbəylinin yaradıcılığı barədə məlumat verib. O, İtaliyada fəaliyyət göstərən və təhsil alan gənc azərbaycanlı musiqiçilərin rolunu “xalqlarımız arasında canlı körpülər” kimi səciyyələndirib, onların istedadı sayəsində Azərbaycanın zəngin musiqi irsinin İtaliya musiqi təhsilinin yüksək səviyyəsi ilə qovuşaraq, mədəniyyət, təhsil və ortaq bədii təcrübələr vasitəsilə iki ölkə arasındakı əlaqələrin möhkəmlənməsinə töhfə verən mədəni dialoq yaratdığını vurğulayıb.
Azərbaycan Mədəniyyət Mərkəzinin direktor müavini Gülnar Tağızadə Ü. Hacıbəylinin həyatı və yaradıcılıq irsi haqqında danışaraq, onun əsərlərinin Azərbaycan mədəniyyətinin beynəlxalq miqyasda tanınmasına verdiyi töhfələri xüsusilə qeyd edib.
Daha sonra Üzeyir Hacıbəylinin həyat və sənətinə həsr olunmuş videoçarx nümayiş olunub.
Konsert proqramı iki gənc azərbaycanlı ifaçı, beynəlxalq opera səhnəsinin istedadlı metso-sopranosu Elmina Həsən və yaradıcılıq və akademik təhsilini İtaliyada davam etdirən Cəlal Bəşirli tərəfindən təqdim olunub. Proqramda Üzeyir Hacıbəyli ilə yanaşı Azərbaycan və İtalyan bəstəkarlarının klassik əsərləri də səsləndirilib.
