“Biz dəfələrlə bəyan etmişik ki, güc yolu ilə özümüzü müdafiə etməyə tam hazırıq. Eyni zamanda, danışıqlar vasitəsilə ədalətli razılaşmaya nail olmağa da hazırıq”.
Bu barədə İranın xarici işlər naziri Abbas Əraqçi İRNA agentliyinə müsahibəsində bildirib.
“Biz konkret şərtlərimizi açıqlamışıq və yazılı plan təqdim etmişik. İndi hər şey ABŞ tərəfinin qərarından asılıdır. Onlarda siyasi rasional düşüncənin üstünlük təşkil edib-etməyəcəyi, diplomatik yolu seçmək iradəsinin olub-olmayacağı, yoxsa əvvəlki kimi təcavüzə can atacaqları əsas məsələdir.
Biz hər iki ssenariyə əvvəlkindən də yaxşı hazırıq. Əgər yenidən bizi sınağa çəkməyə cəsarət etsələr, əvvəlkindən qat-qat sərt cavab alacaqlarını bilirlər. Əgər dürüst diplomatiya yolunu seçsələr, biz də danışıqlara hazırıq.
Hörmüz boğazının açılması ilə bağlı şərtlərimiz kifayət qədər aydın və şəffafdır. Bu şərtlər qəbul edilərsə, Hörmüz boğazı açılacaq və danışıqlar bərpa olunacaq.
Biz prinsipial mövqelərimizdən geri çəkilməyəcəyik və heç bir güc qarşısında baş əyməyəcəyik. Bununla yanaşı, dialoqa üstünlük veririk və qarşı tərəf də belə yanaşma sərgiləyərsə, müsbət əməkdaşlığa hazırıq.
Əks halda, əgər onların niyyəti bizi aldatmaq, yaxud hərbi əməliyyatlara və təcavüzə əl atmaqdırsa, biz buna da hazırıq. O zaman qətiyyətli cavablarımızın şahidi olacaqlar”, – deyə Əraqçi bildirib.
