“Bizim Rusiyaya münasibətdə əsas siyasətimiz ondan ibarətdir ki, Rusiya Gürcüstanın ərazi bütövlüyünü tanımalıdır. Rusiya ilə Gürcüstan arasındakı münasibətlərdə əsas maneə budur”.
Bunu Gürcüstan parlamentinin sədri Şalva Papuaşvili brifinqdə deyib.
Onun sözləriə görə, Moskvanın Gürcüstanın ərazi bütövlüyünü tanıması bütün maneələrin aradan qaldırılması demək olardı.
Spiker qeyd edib ki, Gürcüstan hakimiyyətinin əsas məqsədi ərazilərin işğalına son qoyulmasından ibarətdir.
Parlament sədri işğal altında olan Cənubi Osetiya bölgəsində bu gün keçirilən “prezident seçkiləri”nə münasibət bildirərək deyib ki, “seçkilər” barədə müzakirə aparmaq onların legitim və ya qeyri-legitim olduğunu nəzərdən keçirmək anlamına gələrdi.
“Cənubi Osetiyada heç bir “seçki” keçirilmir. Nə “müstəqil Cənubi Osetiya”, nə də “müstəqil Abxaziya” var. Biz “Gürcü Arzusu” partiyası olaraq Strasburq məhkəməsində sübut etmişik ki, Rusiya bu iki bölgədə effektiv nəzarət həyata keçirir. Bu isə o deməkdir ki, Rusiya hər iki ərazini işğal edib”, – deyə Şalva Papuaşvili əlavə edib.
