Şahzadə Diananın qardaşı Çarlz Spenser iddia edib ki, Diananın ölümünün təsdiqlənməsindən az sonra o vaxt Uels şahzadəsi olan Çarlzla danışıb. O, Çarlzın səsini “həddindən artıq şən” kimi xatırladığını və həmin an onun “lotereya qalibinə” bənzədiyini düşündüyünü qeyd edib. Spenser bunun öz şəxsi təəssüratı olduğunu bildirərək, illər sonra həmin reaksiyanın Çarlzın sevdiyi qadınla evlənmək üçün özünü daha azad hiss etməsi ilə bağlı ola biləcəyini ehtimal etdiyini yazıb.
AZƏRTAC xəbər verir ki, bu barədə Spenserin tezliklə nəşr olunacaq kitabından “Daily Mail” qəzetində dərc olunan yeni hissələrdə bildirilir.
Bukingem Sarayı daha əvvəl kitabdan yayımlanan ilk hissələrə münasibət bildirib. Sarayın sözçüsü kral ailəsinin prinsip etibarilə kitabları şərh etmədiyini qeyd etsə də, yaxın insanın itkisindən yaranan kədərin hətta illər sonra belə insanın düşüncəsinə, mühakiməsinə və xatirələrinə təsir göstərə biləcəyini vurğulayıb. Kralın yeni yayımlanan iddialarla bağlı əlavə açıqlaması olmayıb. Kitabdan yayımlanan digər hissələrdə Spenser bacısı Diananın həyatının son illərində ciddi emosional çətinliklər yaşadığını və intihar barədə düşündüyünü də yazır. Onun sözlərinə görə, Diananın oğulları Uilyam və Harriyə bağlılığı bu düşüncələri həyata keçirməsinə mane olub.
Şahzadə Diana 1997-ci ilin avqustunda 36 yaşında Parisdə avtomobil qəzasında həlak olub. Çarlz və Diana 1992-ci ildə ayrılıb, 1996-cı ildə isə rəsmən boşanıblar. Çarlz 2005-ci ildə Kamilla Parker Boulsla evlənib.
