Smartfon ekranının yuxarı hissəsində görünən yaşıl və ya narıncı nöqtə tətbiqlərdən birinin kameraya və ya mikrofona giriş əldə etdiyini göstərir. Xüsusilə bu indikator heç bir aydın səbəb olmadan göründükdə ona diqqət yetirmək lazımdır.
CHIP portalı yazır ki, məxfilik indikatorları iPhone-larda iOS 14-dən, Android smartfonlarında isə Android 12 və daha yeni versiyalardan etibarən istifadə olunur. Bu nöqtənin görünməsi öz-özlüyündə telefonun sındırıldığını və ya izlənildiyini göstərmir. Lakin tətbiqlərin gözlənilməz fəaliyyətini aşkar etməyə imkan verir.
iPhone-da yaşıl nöqtə kameradan istifadə edildiyini göstərir. Bu zaman mikrofon da işləyə bilər. Narıncı indikator isə tətbiqin yalnız mikrofondan istifadə etdiyini bildirir. Hansı tətbiqin giriş əldə etdiyini “İdarəetmə Mərkəzi”ndən müəyyən etmək mümkündür.
Android-də yaşıl nöqtə kameranın və ya mikrofonun istifadə edildiyini bildirir. İndikatorun görünüşü istehsalçıdan və əməliyyat sisteminin versiyasından asılı olaraq dəyişə bilər. Tətbiqlərin kamera və mikrofona müraciət tarixçəsini məxfilik parametrlərindən yoxlamaq mümkündür.
Nə vaxt narahat olmaq lazımdır?
Əgər istifadəçi həmin vaxt şəkil çəkmir, video yazmır, telefonla danışmır və səs funksiyalarından istifadə etmirsə, lakin yaşıl və ya narıncı nöqtə görünürsə, bunun səbəbini yoxlamaq lazımdır.
İlk növbədə kameraya və ya mikrofona müraciət edən tətbiqi müəyyən etmək və ona verilmiş icazələri yoxlamaq tövsiyə olunur.
Əgər giriş əldə edən proqram tanınmırsa və ya kamera və mikrofon həmin tətbiqin əsas funksiyaları üçün lazım deyilsə, müvafiq icazələri deaktiv etmək olar.
Xüsusilə yaxın vaxtlarda quraşdırılmış tətbiqlərə diqqət yetirmək lazımdır. Şübhəli aktivlik davam edərsə, telefonu təhlükəsizlik vasitələri ilə əlavə yoxlamaq mümkündür. Zavod parametrlərinə sıfırlama isə vacib məlumatların əvvəlcədən saxlanılması şərti ilə son tədbir kimi nəzərdən keçirilə bilər.
