Boş otaqda işığı söndürməyin lazım olub-olmaması tez-tez mübahisə mövzusuna çevrilir. İşığa ehtiyac olmadıqda onu söndürməyin elektrik enerjisinə qənaət etməyə və kommunal xərcləri azaltmağa kömək etdiyi düşünülür.
Azpost.info bildirir ki, Southern Living portalının yazdığına görə, bu suala cavab vermək üçün istifadə olunan lampanın növünü nəzərə almaq lazımdır. Çünki lampalar enerji sərfiyyatına və xidmət müddətinə görə bir-birindən fərqlənir. İşığın nə qədər tez-tez yandırılıb-söndürülməsi də əhəmiyyətlidir. Bəzi lampalarda bu, elektrik sərfiyyatına və lampanın köhnəlmə sürətinə təsir göstərə bilər.
Ekspertlər bildirirlər ki, işığı daim yandırıb-söndürmək heç də həmişə ən yaxşı seçim deyil. Ümumi qayda belədir: otaqdan 15 dəqiqədən çox müddətə çıxacaqsınızsa, işığı söndürün.
LED lampalar: İşığı hər dəfə söndürmək olar
LED lampalar bazarda mövcud olan ən qənaətcil işıq mənbələrindən hesab olunur. Onlar közərmə lampaları ilə müqayisədə 90 faizə qədər az elektrik enerjisi sərf edir. Bu lampalarda işığın tez-tez yandırılıb-söndürülməsi xidmət müddətinə, demək olar ki, təsir etmir. Buna görə də otaqdan hər çıxanda işığı söndürmək olar. LED lampaların xidmət müddəti 25 min saata çata bilər. Nəzəri olaraq, fasiləsiz işlədikdə bu, təxminən 15 ilə bərabərdir. Bununla belə, işığı daim yanılı saxlamaq tövsiyə edilmir.
Kompakt lüminessent lampalar: Tez-tez söndürmək ömrünü azalda bilər
Kompakt lüminessent lampalar da enerjiyə qənaət edən işıq mənbələrinə aiddir. Onların enerji səmərəliliyi təxminən 85 faiz qiymətləndirilir, orta xidmət müddəti isə 8 min saata çatır. Lakin belə lampaların tez-tez yandırılıb-söndürülməsi onların daha sürətlə köhnəlməsinə və istifadə müddətinin qısalmasına səbəb ola bilər. Məqalədə qeyd olunur ki, lüminessent lampa yandırılarkən elektrik sərfiyyatında yaranan qısamüddətli artım ümumi enerji istehlakına ciddi təsir göstərmir. Ancaq bu proses lampanın elektrodlarındakı örtüyün daha tez aşınmasına səbəb ola bilər.
Buna görə də otaqda 15 dəqiqədən çox olmayacaqsınızsa, bu tip lampaları söndürmək tövsiyə edilir.
Halogen lampalar: Enerjinin böyük hissəsi istiliyə çevrilir
Halogen lampalar iş prinsipi baxımından közərmə lampalarına bənzəyir, lakin onlardan bir qədər qənaətcildir. Bununla belə, LED və kompakt lüminessent lampalardan geri qalır. 2023-cü ildən etibarən daha enerji səmərəli alternativlərə keçid məqsədilə halogen lampaların dövriyyədən çıxarılmasına başlanılıb. Buna baxmayaraq, bəzi evlərdə onlardan hələ də istifadə olunur. Bu lampalar sərf etdikləri enerjinin təxminən 80–90 faizini istiliyə çevirir. Xidmət müddəti isə təxminən 1–2 min saatdır. Buna görə də mütəxəssislər elektrik enerjisinin boş yerə sərf olunmaması üçün otaqdan çıxarkən halogen lampaları söndürməyi məsləhət görürlər.
Közərmə lampaları: İşıq lazım deyilsə, mütləq söndürün
Közərmə lampaları ən çox elektrik enerjisi sərf edən işıq mənbələrindəndir. İstehlak etdikləri elektrik enerjisinin yalnız təxminən 10 faizi işığa çevrilir, qalan hissəsi isə istilik şəklində itirilir. Bu lampaların xidmət müddəti 750–1000 saatdır. Buna görə də işığa ehtiyac olmadıqda onları söndürmək xüsusilə vacibdir.
N.Talıblı
